لبيه .. يا صوت دعانـي ولبيـت
ياأعـز مخلـوقٍ بصوتـه دعانـي
مافيه أحد مثلكـ على الكون حبّيـت
فضلكـ من أقدامي لراسـي كسانـي
يانبض شرياني وياشمعـة البيـت
يامهجتي عن كـل قاصـي ودانـي
أضيق من فرقاكـ وارتاح لاجيـت
ياسلوتـي يانبـعِ كـل الحـنـانِ
من دون شوفكـ حيي في حِسبة الميت
وارتاح لو شوفـكـ بعينـي ثوانـي
أزريت أعبر قدركـ وحبكـ أزريـت
يعجز عن التعبيـر منطـق لسانـي
كم مرّة في شانكـ أذنبت وأخطيـت
والعفـو منـكـ كـن ماشـيّ كـانِ
أنا لكـ الخادم علـى كـل توقيـت
اللي تبين يصيـر فـي كـل شـانِ
مالي فضل مهما من البـر سوّيـت
لي الفخر مابيـن قاصـي ودانـي
لكـ دعوة منّي إذا أصبحت وأمسيت
يجزاكـ مولايـه بخضـر الجنـانِ
في وصلكـ بنظم القوافـي تغنيـت
ماسقت شعري في وصال الغوانـي
فيكـ الشعر مهما نظمتـه وسوّيـت
ماأظهرت شي بين عوج المحانـي
أفخر بنظم الشعر بيتٍ بعـد بيـت
ياحيـي والله فيـكـ غِـر المعانـي
كل القوافـي طاوعتنـي وغنّيـت
مافيه بيـت لا زهمتـه عصانـي
تفجرت عنـدي سـوات الدناميـت
وأصبح عسير القافيـه مطوعانـي
