ياللي يتقلب بالعواصف ... مناخك
اربع فصول العام عجزت . تداويك
اشوفك هاليومين تتبع .. جخاخك
ناس على شان المطاميع ... تتليك
يا كبر فرق الآخ آخي ....... وآخك
وش قرب الغدران للعد .... يا بيك
عجزت انا افهمك طيخك وطاخك
حتى الليالي ما تعدل .... مماشيك
الله يستر من بلاوي ..... صراخك
في ساعة بالناس تفشل . هقاويك
احذر من القصاب يقصب صماخك
يفصل مفاصل رقبتك يوم يفريك
ما ينفعك كثر الهبل مع . طخاخك
ترمي على غير اتجاهك .. مراميك
ما غركم يا كود كثرة ..... جماخك
ناس تشجع جمختك تنتعش فيك
حاول تصيد مبركك في ... مناخك
قبل يصيدك بينهم من ..... يباريك

القارظ العنزي