والله إني مِنَ اول كنت أظنَّي أبيك
وإني أمشي معك بالحب لابعد مدى


لين ما ذقت طعنات الغدر من يديك
طعنةٍ شمتت فيني جميع العِدى


واكتشفت إن قلبي كان مخدوع فيك
والمشاعر معك في الحب راحت سُدى


انتهت رحلتك ربي يسهل عليك
لا تعذَّر كفاني فعلك اللي بدا


لا تدور فُرَص من قلب بطَّل يبيك
ردة الفعل عندي ما بعدها صدى


صرت في عالم النسيان مالك شريك
كل من راح قبلك أعتبرته غدى


تدري إني إذا قفيت ما عاد أجيك
اتجاهل عتابك طِيب ما هو ردى


لا تبرر لمن قفى وراح ونسيك
ما يرد الندم للورد قَطْر الندى


انتهينا لا تِتْرجى ولا أرتجيك
كل بركان فجرته بصدري هدا


انتهت قصتك فارقني الله يهديك
كل جرحٍ لنسيانك نزفته .. فِدا




سُهيل