كتاب: لأ بطعم الفلامنكو
كتاب بلغة بسيطة وسلسة مناسبة ليك خاصة لو كنت مبتدأ في القراءة وبتحس بملل منها فهنا هتكون مرتاح جدًا وانت بتقرأ لأنك هتحس إنك قاعد في جلسه خاصة مع مؤلف الكتاب لسهولة طريقة السرد..
بياخدنا د. محمد طه في رحلة الكتاب وبيقولنا إن التغيير هو أكبر تحدى ممكن نواجهه في حياتنا
والتغيير الحقيقي، بيكون معاه عقبتين..
العقبة الأولى..
إنك هاتكون عامل زى الطفل المولود جديد، بتخرج للحياة ومعاك كل المخاوف زى ما معاك كل الفرص، بتتعرف على نفسك وعلى الناس وكأنك بتشوفهم لأول مرة..
بتختار اختيارات جديدة، و تمشى فى سكك مختلفة، حتى لو كانت صعبة.. أو مهجورة.
أما العقبة التانية.. هى إن التغيير ليه تمن.. والتمن ده ممكن يكون غالى جداً.
فالكتاب ده عن التغيير اللي لازم يحصل في شخصيتك، عن خطواته، وعن تمنه..
عن احتياجاتك، ومخاوفك، وحقوقك النفسية..
عن قراراتك اللى أخدتها زمان، وقراراتك اللى هاتخدها دلوقتي!
علشان كده جهز قلبك وعقلك وروحك..
لتقابل نفسك ..
كما لم تعرفها من قبل..
