من عاداتي - اللي أعتبرها سيئة -


الاحتفاظ بذكريات المناسبات أو المواقف

مهما كانت تافهة

ورقة شخط عليها طفل شخبوطة و عطاني اياها أخشها

كرت زغير معلق بهدية غالية ، عادي أوزع الهدية و احتفظ بالكرت لسنواااات

صور

أرقام

أشياء

لحد ما صار عندي أزمة تكدس الذكريات

شي الكتروني

و شي عيني ملموس

لدرجة إنه عندي فلوس عليها اسم أو إهداء أو حتى حصلتها بسبب ظرف معين

ما أصرفها و أخبيها بصندوق خاص

غالبا هالأشياء مرتبطة بالنسبة لي بفكرة الاهتمام

أو التوافق النفسي .. أو المواقف المميزة


يعني مثلا عندي رسايل الكترونية من أكثر من 15 سنة و متنوعة

في رسايل هواش هههه شايلتهم بملف لما أفتحهم أضحك على نفسي ههه شنو كان وضعي بلحظتها

في رسايل توريك شلون الدنيا تتغير خصوصا اللي يقولون ( إحنا أبدا ما راح نتغير )

أحب أبشرهم عندي أدلة ضدكم تثبت انكم تغيرتوا .. حتى آنا تغيرت

من ضمن جبل ذكرياتي المرصوصة في صناديق و ملفات

ورقة صغييييرة 2سم ب 3 سم

كنت بالبحرين في سوق المحرق القديم أظن و مرت علي بنوتة من ضمن فريق تطوعي و دست الورقة بايدي بشكل خاطف و راحت بس اتذكر إنها محجبة

فتحت الورقة مكتوب عليها : ابتسم فالقادم أجمل .


عاد من يومها و أنا ناطرة الأجمل يشرف و يتنازل و يجي

كل اللي مروا علي جياكر و طلّتهم تضيق الخلق

عاد اخذوا من هالسوالف .. كلها بالصندوق