من نص ساعه وصلني عن طريق الخايب المتعوس الوتساب
اللي و الله مو محتفظة به إلا لأنه أمي تتفقدني من خلاله لو طولت و تأخرت بس تشوف آخر اتصال و تتأكد إني من الأحياء
وصلني خبر يكشف شريحة من الأهل اللي محتاجين قانون عقوبات دولي يربيهم عشان يعرفون يربون عيالهم
شرطي وقف شاب يقود سيارته برعونه و استهتار
على طول الولد دق على أمه و أبوه و بظرف دقايق تواجدوا في المكان
و تقوم الأم تمد ايدها على الشرطي هي و ولدها و الأبو الله أعلم شنو كان دوره ؟!
يعني (أبِّييييييه )
هذا اللفظ اللي مدري شلون المسلسلات شوهته و غيّرت لفظه إلى ( أمبيه )
ترى احنا نقول : أَبٍّييييييه .. و الياء مو مكسوره حيل يعني مد على ألف شوي
و معناه : استغراب شديد مصحوب باعتراض و استنكار
المهم
لما شفت مقطع الفيديو انذهلتُ و استأتُ و عصّبتُ و تنرفزت و تعجبت وين وصلت قلة الحيا و الجرأة في بعض الأهالي
يعني شنو مستوى تربية الولد اللي الأم هذا سلوكها !
يا رب لا تبلانا بهالنوعيات و لا تتقاطع طرقنا بطرقهم ..