منتديات مسك الغلا | al2la.com - عرض مشاركة واحدة

**رَوْحٌ** · 01-08-24, 10:21 AM


	المشاركة الأصلية كتبت بواسطة الْياسَمِينْ


	عدنا لسرد أول حكاية غريبة.. السرد طويل لكني على ثقة كاملة أن من يقرأ الحكاية يود أن يعرف النهاية الحكاية من فترة قررنا نحجز للأولاد الذهاب إلى ونترلاند من الساعة 6- 11 ليلا .. عادوا للمنزل الكل مبسوط إلا البنت ياسمينة البوز شبرين قدام ،الخدود طماطم ، لما تكون حزينة ما أقترب ناحيتها أنتظرها تهدأ ، إما هي تبادر بالكلام أو آخذها على جنب بعيد عن الكل وآخذ بخاطرها.. دخلت غرفتها وما خرجت مع أن اليوم الخميس مسموح لها السهر.. البنت نامت وهي زعلانة ، طيب كيف يجيني النوم وأنا لا أعرف مشكلتها ؟! خرج بنيامين وجلس معنا وكان مستاء جدا من تصرفات أخته .. ممتاز ، إذن سأعرف حكاية البنت من أخيها .. هو مستاء لأنها تحتفظ بنقودها وتطلب من بنيامين يصرف عليها ، أخبرني بأنه دفع عنها كل الألعاب وهي لم تدفع فلسا واحدا ، سألته هل وبختها؟ هل هذا سبب زعلها؟! قال : لا لأنكِ ستعوضينني .. غريبة البنت كريمة ، ما شعرت في يوم أنها تحتفظ بالمال ! قلبي نغزني في سر بالموضوع ، بطاقتها الائتمانية معها حالها حال أخيها وعبدالله اليتيم ! دخلت غرفتها بهدوء حتى أتأكد أنها فعلا نائمة ، وجدتها تبكي ، احتضنتها وسألتها : مابكِ ؟! أخبرتني أننا ( تقصد أنا ووالدي) في الفترة الأخيرة نفرق بينها وبين الولدين نحول مبالغ لهما وهي لا ، بطاقتها دائما فاضية واليوم أخوها لعبها على حسابه! استغربت من كلامها قلت لها غير صحيح نعاملكم كلكم سواسية كيف بطاقتك فاضية هاتيها.. وبسرعة اتصلت على البنك وعن طريق الرد الإلكتروني سمعت أن رصيدها 250 فلس ! أووووف . تحدثت مع موظف البنك واستفسرت عن الحساب - طبعا لأنها طفلة 14 سنة وأنا فتحت الحساب لها ،فسهل جدا الموظف يرد على استفساري ويعطيني المعلومات - أخبرني بالعمليات التي أجريت على حسابها .. شراء الذهب / جوال/ دفع اشتراكات لشركة الاتصالات / دفع فواتير الكهربا طلبت من موظف البنك إيقاف البطاقة فورا على أن أراجعهم يوم الأحد .. رجعت للبنت .. -في أحد ماخذ منك البطاقة ؟! نفت كلامي - أعطيتي رقمك السري لأحد ؟! لا - معقولة هكروا حسابك ؟! طيب لاتهتمي أفتح لك حساب جديد الظاهر في أحد يسرقك ! ما انتظرت ليوم الأحد ، أخذت السواق وطرت على المطار لأن البنك 24 ساعة مفتوح في المطار .. طيب الotp يصل على جوالها يعني هي اللي شارية الذهب والجوال مافي هكرز ولا شي أخذت اسم محل الذهب ومحل الالكترونيات (best) طلعت من المطار الساعة 2 بالليل على المحل لأنه يفتح 24 ساعة ، دخلت وعطيتهم جوال بنتي أخبروني أنها اشترت عدد 3 جوال بروماكس 15 بمبلغ وقدره.. شعرت أني بقفد الوعي ، إيش اللي قاعد يحصل ، انتظرت الصباح وراجعت محل الذهب ،طلبت منهم كل فواتير تاريخ معين عطيتهم إياه بعد ما أخذته من البنك ظهرت فاتورة باسم بنتي وصورة من بطاقتها المدنية ورقم جوالها .. لغز كبير قدامي لازم أحلها ، ما همتني المبالغ اللي انسحبت ، لكن السؤال هل هي فعلا هذي فعايل البنت ؟! مستحيل ثاني يوم تناقشت مع أبي بموضوعها ، جن جنونه ، طلب مني أفرغ كاميرات البيت . طيب الكاميرات بالصالات والممرات ومداخل البيت ومواقف السيارات ،مش بالغرف ، ماراح نتوصل للحقيقة ، قلت لازم أشد على البنت وأخليها تعترف ، رفض وبشدة بحجة أننا مربيها أحسن تربية ولايمكن تتصرف بهذا الشكل .. قرر يبلغ الشرطة ويفتح محضر ، قلت مافي داعي خلاص وقفت حسابها وبفتح لها حساب جديد .. اعترض ، لازم أبلغ مش عشان المبالغ اللي انخصمت ، عشان ما أسمح لأحد ينزل دمعة واحدة من عيون حفيدتي .. هنا التزمت الصمت .. بلغنا الشرطة احتاروا كيف يتوصلون لمن قام بعملية النصب والاحتيال.. قلت ممكن نطلب من المحلات إفراغ كاميراتهم ، وفعلا كانت اللي تشتري باسم بنتي منقبة ونظارة سوداء ولابسة أسود وكفوف سود ، ومافي حقيبة معها حتى الجني الأزرق ماراح يعرفها … احترنا والله ، هنا أبي شك بمربيتها لأنها الوحيدة التي تدخل غرفتها وتجلس بالساعات تنظم غرفتها! قلت مستحيل ، اللي سرق بنتي دافع فاتورة كهربته وفواتير المكالمات ، هنا انتبه والدي ، في فاتورة مدفوعة من حساب البنت، خلاص راح نتوصل للمجرم ، فعلا المجرم لا زم يترك أثر لجريمته ، وعرفنا المبلغ اندفع لصالح فلان ، نادوا الشخص ، وسألوه إنت دفعت فاتورة الكهرباء 80 دينار ، قال : أسلم المبلغ للمدام وهي اللي تدفع .. وطلعت المجرمة والنصابة والدة صديقة بنتي ياسمينة ، واعترفت بجريمتها : كانت تشتري وتدفع عن طريق appel pay بعد ما برمجت كل معلومات حساب بنتي في المحفظة من بطاقتها أثناء اللعب مع ابنتها ، من فترة جوال بنتي ما كان يشتغل أهملت الموضوع واعطيتها جوال ثاني، وفقدنا بطاقتها المدنية واستخرجنا بدل فاقد ،كانت النصابة استخرجت شريحة بدل فاقد باسم بنتي ، معها البطاقة الأصلية فكل مسجات البنك وال otp على الجوال بيدها باقي الرقم السري كيف عرفته ، اعترفت أنها بطريقتها سحبته من بنتي قالت لها افكر احط رقم سري ساعديني ، وبنتي على حسن نية أخبرتها حطي سنة ميلادك مثلي عشان لاتنسين .. بعد ما عرفت أنها والدة أعز صديقة لبنتي ، تنازلت ، حتى لا أحرم ابنتها من صداقة بنتي ، فهي طفلة لاذنب لها بخطايا والدتها فقط منعت بنتي من زيارتهم، تلعب معها في المدرسة أو صديقتها تزورها .

هذي الأم تخوف
كيف فكرت وخططت ونفذت الخطة
تفكيرها مو طبيعي !

كأنها مثل اللي في الروايات والأفلام
لو تستغل مخها عشان تفكر كيف تكسب فلوس
أحسن لها من السرقة

الحمدلله الذي عافانا

حبيت أسلوبك في السرد
يحمس للقراءة ومعرفة النهاية

وأحس القصة جاية بوقتها يمكن عشان ننتبه
ونتوقع أي شي من أي أحد

وأنا قبل فترة انسرقت فلوس من حسابي
بس لأن المبالغ اللي انسرقت كانت صغيرة
اكتفيت بإغلاق الحساب فقط
وطنشت الموضوع ولا عرفت منو اللي سرق الفلوس

بس بعد هالقصة لازم أكون حذرة أكثر

~

شكراً على مشاركتك