شوف يا استاذنا .. هي اراء طبعا ..
بس انا بقول ان الفترة ما بين سنة 1915 الي 1975 مثلا
هي اكثر فترة مظلمة في تاريخ البشرية

مش هقولك ان الفترة دي حصل فيها حرب عالمية اولي وتانية
وانفجار نووي ... لا لا .. ده كان وش التورتة ..

تعالي هاخدك جولة في جزء تاني من العالم
خلينا نبدأ بالصين ...

عند ضريح الزعيم الشيوعي الصيني ماو
الرجل ده ليه ضريح ومعابد تخصه في الصين
والناس بتزورها ...
الناس في الصين عندها تروما
ومش قادرة تواجه الماضي بتاعها
لأنه هيدينها ... والحزب الحاكم في الصين مش قادر
يتكلم عن خطايا ما لأنه هيهدم الاساسات اللي قايم
عليه الحزب الشيوعي اللي بيحكم الصين ...

وبالتالي ممنوع ان الناس تتحدث عن الفترة بتاع ماو في الصين
او مناقشتها او تأليف كتب او جمع شهادات من الاشخاص
اللي عاشوا الفترة دي ...

انا عارف ان في ناس عندها حساسية من المصطلح اللي هقوله ده
بس الرجل ده كان تجسيد لفكرة عبادة الشخصية ..
رجل قدر يقنع شعبه انه يشارك في خطاياه ..

انا هاديك عناوين بس كناقل .. عشان الكلام يطول ..


لو رجعت بالزمن ورا شوية
في 3 احداث مهمة في تاريخ الصين الحديث
اسست لاسطورة ماو ...

... القفزة الاقتصادية.. المائة زهرة ... ثم الثورة الثقافية ..

القفزة الاقتصادية :
1- اول الكلام كدا اعدام مليون شخص من كبار ملاك الاراضي الزراعية
عشان يعمل اصلاح زراعي بطريقته ...
2 - المتخلف عشان يزود الانتاجية الزراعية قالك احنا عندنا اعداء اربعة
اللي هما الفيران والعصافير باين وحاجتين كمان ...
احنا كشعب بالكامل لازم نتعاون عشان نقضي عليهم .. وقام مسخر الشعب كله
انه يقضي علي الاربعة دول ... وكان كل واحد كل ما يقتل فيران اكتر مثلا
ليه مكافأة اكبر ... لحد ما خلص عليهم ... عمل كارثة بيولوجية ..
واختلال في توازن البيئة ... قام الجراد كتر .. قام مخلص علي كل المحاصيل
الزراعية... نتيجة لسوء ادارته دي .. الصين مات فيها من المجاعات
اكتر من 55 مليون بني ادم ...
وفي الوقت ده كان اصلا عشان يعمل القفزة الاقتصادية
كان موجه ان الشعب كله يركز في حاجتين اتنين بس زراعة القمح
و انتاج الصلب ... وكان عامل تارجت لكل واحد .. وكانت اهداف تعجيزية
فكان بسبب تعجيزية الاهداف ... حاجة زي الصلب ده
انتاجه كله بيكون نوعياته رخيصة بسبب ان الناس بتحط
اي معادن ... فمع الوقت كل الانتاجية دي صفر ..
وكان العامل في الزراعة بيشتغل 16 ساعة عشان اخر النهار
ياخد فقط 250 جرام اكل ....يكفي ليه ولعائلته ..
وده برضه ساهم في ال55 مليون بتاع المجاعة ...

المائة زهرة

.. ده قالك فيها دع الازهار تتفتح ... اللي هو ايه كان بيقول للناس
احنا ديموقراطيين ... اللي عاوز يقول حاجة ضد الحزب وينقد
ويقول رأيه بحرية ... يتفضل ... واحنا هنتقبل ...طبعا الجرايد كتبت
وناس من الحزب نفسه بدأت تنقد ... وكتير من المثقفين والنخب
بدأت اصواتهم تطلع ....
طبعا الحوار ده كان كمين عشان يلم كل المعارضين .
قام لامم اكتر من مليون شخص من المعارضين في حملة تطهير
وقام موديهم المعتقلات ... عشان يحولهم لاشخاص صالحين بنظره
بحيث يصلح افكارهم لكي تناسب الحزب ..

عندك بقا الثورة الثقافية ....

دي بقا اللي تأثيرها في الصين لحد النهاردة
وكتير متخوف انها تتكرر..بالذات ان نفس الحزب الشيوعي مازال يحكم
واضرارها النفسية مازالت موجودة لانها ضيعت جيل كامل ..

لما الرئيس الصين وقتها بدأ يدين ماو عشان نتايج المجاعات
في القفزة الاقتصادية ... لان ايامها ماكنش فيها صحافة بالقوة الموجودة حاليا
وغالبا العالم ماكنش يعرف باللي بيحصل في الصين اساسا ..

ماو بدأ يفكر بشكل جديد ...
طلع وقالك ان سبب فشل القفزة الاقتصادية
هما البرجوازيين من المثقفين والنخب
اللي اختلطوا بأفكاره الشيوعية
وافسدوها عشان يسقطوا الحزب ...

وكان موجه كلامه ده للاطفال من سن 13 الي 20 سنة
اللي هما اتربوا علي اسطورة ماو الوهمية
اللي من خلالها انه انهي الغزو الياباني وصاحب المسيرة الطويلة
وحوار كدا ... للي حابب يقرأ عنه ..

الشباب دول انشأوا ما يسمي بالحرس الأحمر
الحرس الأحمر دول الكتاب المقدس بتاعهم كان اسمه الكتاب الاحمر
اللي هو عبارة عن مقولات مشهورة للزعيم ماو ..
فحرقوا كل الكتب التانية ...

الشباب دول كان كلمة متطرفين او متعصبين لافكار ماو
مش كفاية لوصفهم ...

دول حرفيا البعض قتل عائلته او راحوا الجامعات وقتلوا مدرسين ونكلوا بيهم
وعذبوهم في الشوارع ...
وفيه مدرسين انتحروا من هول المنظر ...
عشان متخيلين ان جزء منهم
معارض لافكار ماو اللي افسد القفزة الاقتصادية بتاعته ..

يعني ماو وكلهم بالنظام في البلد وهما بعصبيتهم دي
قدروا ينهوا كل المعارضين لماو ..
او انهم يدلسوا علي خطيئته هو ..

ضحايا فترة الثورة الثقافية اللي انتهت بموت ماو في منتصف السبعينات
كان حوالي مليون برضه ..

المشكلة مش في عدد الضحايا
بقدر ان الجيل اللي كان تعداد بالملايين من الشباب
كان فيه وصمة عار وتروما لاحقتهم بسبب الأفعال
المخزية اللي قاموا بيها ..
وبالتالي ماو اشرك شعبه في خطاياه
وبالتالي لحد النهاردة رغم كل اخطائه وجنونه
مازال مخلد في ذكري الصينين انه زعيم قائد لنهضتهم ..
وليهم معابد وضريح اتعمل بعد ما مات ..

لان مجرد الاعتراف بالخطايا
هيفتح جرح لجيل كامل وقتها ..
هو جيل الاباء دلوقتي ...ماحدش هيقدر يوقف النزف بتاعه
هيهدم بلد كامل ..