*
*
تمر الأيام والدنيا محطة عبور!
وأنا على حطة يدك قبل توديعها
ماعدت أفرّق مابين غياب والا حضور!!
أوسِّد أيام عمري كف أسابيعها
ما أقسى من الفقد غير إني على آخر ظهور
أثر غلا نجد حتى في ذعاذيعها !
يا نجد واللي خلقني لك بتسعة شهور
الناس لو عاتبتني فيك ما أطيعها
أنتي حميدة نسب وأنا مافيني قصور
لو الأيادي تعايب بي بأصابيعها
وقع الجروح العميقة ماكنه بالصدور
ومنك الجروح العميقة كيف تشييعها؟
عايش و مستنكر الدنيا متاع الغرور!
بعدك ما تغنيني الخيل و مصاريعها!
ولا الليالي ولا حتى سوالف تدور ؛
ولا النقاشات تغريني مواضيعها !
أعتب على أهل الحياة بدمعة أهل القبور
وأقول لله مرجعها .. وتوديعها !!
أنتي وحبي لك ليوم الحشر والنشور
ونفسي رهينة تفرقها و تجميعها !
*
*