اللايك ده عامل زي
بناء هرمي مقلوب للعلاقات العامة
قاعدة الهرم بتكون معكوسة
وبالتالي بتكون اوسع في بنائها
فبتبدأ بأنك عاوز توزعه الاول عشان
تبدأ اول سلمة في بناء شبـكة علاقاتك
بتقديم الصورة اللطيفة عن نفسك
وبعد كدا القاعدة بتقل سمكها
لحد ما تبقي هذا الشخص
اللي علي مقدمة الهرم من تحت
عطاءك بيقل .. وبتكون انتقائي اكتر
لانك في وقت ما بتكون اكتفيت
من فكرة الزيف اللي بتبنيه ..
وفي نفس الوقت منتظر
انك تكون المستقبل للايك طول الوقت ..
وبالتالي بتحول من موزع .. لمدمن ..
ده للبعض .. وبالتالي اللايك بيصبح بمثابة حياة ..
او وسيلة لانعاشك .. اوانك موجود ..
وبالتالي قيمة ما تقدمه
اصبح غير مهم ..
لأن العلاقات العامة اللي اللايك بيمثلها
هدفها مبني علي المنفعة المتبادلة
اللي انت طرف منها في العلاقة ..
مش شرط لايك بس ..
ممكن كلمة حلوة مقابل كلمة حلوة ..
تحرير رهائن يعني ..
ده الجانب السلبي او المكعبر من الموضوع ..
ممكن يكون مش شاغل ناس كتير ..
وده طبيعي ..لأن الحياة مش بتدينا الفرصة دايما
نفكر لكل شئ بشكل تفصيلي
بس هيوصلك كنتيجة للشخص اللي بقا يستجدي اللايك ..
اللي حضرتك ذكرتيه في طرحك ..
الجانب السلس هو ان اللايك وسيلة للتواصل
وسيلة للتقدير ..
مش مقتنع انا بفكرة انا عملت لايك
عشان اقولك انا قريت الموضوع ..
لايك يعني اعجاب بالشئ .. او تنبيه في نقاش
اني رديت علي تعليقك ..
فعاوزك تنجز وترد بسرعة ..
مصداقية كل شخص مع نفسه
هي اللي بتحدد طبيعته ..
فهم كل شخص لنواياه وشخصيته
هي اللي هتخليه فاهم وضعه ..
يمكن انا كطبع بقيت جاحد شوية
بمعني انا في حاجات كتيرة بقرأها وبتكون عاجباني
بس اخر حاجة بكون بفكر فيها
اني ادوس لايك ..
بحكم اني اتعودت فترة طويلة
اني مش حابب الفكرة ..
كاره زرار اللايك .. لسبب ما يعني ..
فبطلع من المدونة او الطرح وبكون ناسي اصلا
ان الزرار موجود ..
بس هي الفكرة مش مذمومة ..
محتاجة بس الشخص يفهم انه لازم يكون متوازن نفسيا
عشان مايوصلش لدرجة انه يكون متعطش
ان الرضا عن نفسه يكون بلايك ..