الأطفال عندهم اجابه لطيفه جدا عن سؤال: ايه اللي كسر دي؟ او ايه اللي خرب ديه؟
اسمه: هي اتكسرت لوحدها...
للأسف الشديد بنشوف ناس بتكبر وهي لسه بتفكر بنفس الطريقه..
و بتجاوب نفس الاجابه...
ايه اللي خرب حياتك كده؟
معرفش
الظروف
بابا
ماما
هي خربت لوحدها...
وبيبقى الهدف من الاجابه دي هو نفس هدف الأطفال..
التهرب من المسؤولية..
طيب ليه ده بيحصل؟
ببساطه لأن تحمل المسؤولية عن كل البلا الأزرق اللي بيحصل في حياتك شئ صعب..
وتقبل ان الظروف السيئة شئ هيواجهك مهما تعبت ومهما حاولت.. هو شئ صعب..
والأصعب هو انك تجتهد علشان تنجح وتحقق حاجه.. رغم كل حاجه..
المشكله الاساسيه اللي هتواجهك في النقطة دي.. انه على الرغم من صعوبة الموقف.. الا انك مش هتعرف تغير اي حاجه في حياتك من غير ما تتحمل المسؤولية..
لانه بحسبه بسيطة جدا.. اللي انت شايف انه مش في ايدك وانت مش مسؤول عنه.. هتشوف انه يستحيل تغييره.
وبالتالي.. انت اصلا مش هتحاول..
مفيش حاجه بتتكسر لوحدها.. مفيش حاجه بتخرب لوحدها...
واكيد.. مفيش حاجه بتتغير لوحدها..
وعليه.. انت محتاج لمجهود.. واوقات كتير مجهود كبير.. علشان تقدر تقوم تغير اللي مش عاجبك..
لأنك للأسف لو معملتش ده.. هو مش هيتغير لوحده..