الطفل الصغير اللي أول ما وعي علي الدنيا لقي أهله بيقولوله " يا حمار.... يا غبي.....انت معندكش مخ.....انت مقرف...... "
هيطلع مقتنع انه حمار و غبي و متخلف و كله عيوب..
هيبقي فاقد الثقة في نفسه من غير أي ظروف يتعرضلها و بدون أي ضغوط حياتية..
هيطلع متوقع الفشل و انه مكروه من اللي حواليه حتي لو كان متفوق و بيحب صحابه..
ايش حال ابوه و امه بيشتكوا من غبائه و من قرفه و ان دايما مقارنته بأقرانه بتكون لصالحهم و بقي بيتوقع كده علطول، يبقي هيجيب الثقة بنفسه منين و هيحب نفسه ازاي و هيتقبل أهله من انهي اتجاه ؟؟
الطفل ده بيبقي كاره للتجمعات و للحياة الاجتماعية ككل..مش قادر يختلط بأصحابه لأنه متأكد انه اقل منهم بناءً علي كلام اهله ليه..
اهالي كتير بتنسي يعني ايه تربية..يعني ايه نفسية طفل..
يعني ايه نشدً و نرخي..
اهالي كتير بتنسي انها خط الدفاع الاول لولادها و انهم معني السند و الحماية و الضهر..
انت اول واحد بتدًي لابنك الثقة و بتقول لولادك انهم مميزين و نعمة كبيرة من عند ربنا و ان وجودهم بيحلًي الحياه مش بينكد عليك عيشتك..
اهالي كتير مقضياها ضرب و زعيق و معلقينها علي شماعة التربية!!
اهالي كتير بتطلع اطفال متدمرة نفسياً بس فرحانة انهم طوع ايدهم و ملهومش حس.. فرحانين بشخطهم فيهم و بصة الرعب في عين ولادهم لما ينادوا عليهم!!!
لا تتعجبوا من انطواء اولادكم..
لا تتعجبوا من نظرة الانكسار اللي بتشوفوها في عيونهم و بالوقت بتتحول لنظرة تحدي و عند لكل حاجة من ناحيتكم.
لا تتعجبوا من انه اول ما يكبر و يفهم اللي عملتوه فيه يبعد عنكم و يقرر يعيش كل لحظة لوحده حتي لو هو مش قد الوحدة دي..
ما تربوش ولادكم علي الاهانة عشان دي مش تربية دي كسرة نِفس