الهدو لا خيم الليل فالجو العليل
و الهبوب اللي غصون الشجر تومي بها
حاجة تترك ورى حنوة الضلع النحيل
غصة تنشد عن العين و أخاطي بها
ما يطفي نار جوفي شراب السلسبيل
لين أصور حزني بيوت و أغني بها
يا خليلة قلب شاعرك ما قبلك خليل
في ضلوعٍ ما قدر غيرك يفلي بها
ليه و أنتي عودك الين من الغصن الظليل
قلبك أقسى من عيونك و من تعذيبها
لا تحدين المهايم على سوء السبيل
لين يلعن سيرة الحب ويضحي بها
لي متى و أنتي وصالك مثل كف البخيل
و طبعك يحد الضماير على تانيبها
الجفا ما بعده الا المفارق و الرحيل
و دمعة ودي بموتي و لا ودي بها
أعزليني عن هوى كل منسوعة جديل
ودها تاخذ مكانك وعيا صيبها
وقابليني بالسماحه و بالبال الطويل
حاجتين وش يضرك ليا جيتي بها
لا يغرك ما يقولون في الماضي الجميل
ما حكوبه عن بثينه و عن حبيبها
أنتي أجمل من بثينه و أنا أشعر من جميل
بس حنا سالفتنا ماحدٍ ، يدري بها