إسجعي في صوتك الشادي وغني ياحمامه
في ضميري شي ، وبعيني دموعٍ ذاخرتها
أتصّبر : والصبور يبين في وجهه علامه
لو نثرت الدمع من عيني على صخره .. نحتها
فالحياه أيام : تاخذ شي من يوم القيامه
تجعل اللي فوق وجه الأرض.. يّحسد من تحتها
كيف يرضى واحدٍ مثلي وشرواي .. إنهزامه
شوّهت لـ أيام وجه الصفحه اللي ماطوتها
لو نشدت الليل : يعرفني مساريه وظلامه
كم فجوجٍ ماقطعها الذيب .. وأقدامي مشتها
وعن لهيب الشمس ماأدّور ظلال ولا عمامه
كنت مثل الشجره اللي ظلها تحت ورقتها
ماتركت إلا السراب .. ولاتبعت إلا الغمامه
ولامشيت إلا الدروب اللي محد قبلي نعتها
كيف أغادرها بدون حزام ، وخطام ، ومسامه
ليه تنصفني مباديها .. ويظلمني بختها
للسلام الداخلي : ماني بواصل بالسلامه
لين تلقا النفس في راس الطليعه منزلتها