من أقسى النعم في هالزمن نعمة الادراك
تحرّر عقول ( أصحابها ) . . بس تسجنهم
كم وجيه من خلف أقنعتها ، وجيه عداك
تمر الظروف . . وتنكشف لك ، مـعادنهم
عساهم فدا اللي طل من شرفة الشباك
وخلاني آعاف ( البشر ) .. وأختفي عنهم
جمعنا الطريق اللي نبت في ثراه أشواك
وصار اثمن مْن دروب ناسٍ ما آواطنهم
نديم السهر ماجازت النفس عن ذكراك
وجازت عن وصوف البنات .. ومفاتنهم
عيونٍ . . رسمت بـ دربهم ، طلة محيّاك
اذا ما قدرت إسعادهم .. ليش تحزنهم
لا زال الشعور يفزّ لك . . ما يبي ينساك
طبيعي . . يحنون الحبايب ، لـ أماكنهم
أبي ما يهدي . . روع قلبي ، بعد فرقاك
جميع البشر .. في حاجة اللي يطمنهم
مع انك هنا وشلون اشوفك هنا وهناك
متى صرت كل الناس . . يا واحد منهم