عام بـ لياليه وايّامه . . من المستفيد
من ( غيبةٍ ) .. كل ما طالت تحمّلتها
أعاند النفس . . واقنعها ، بما لا تريد
والنفس لااقنعتها بـ الصدق ، زعّلتها
تنتابني لهفةٍ تنقص . . و ترجع ، تزيد
سحابةٍ .. كل ، ما طال المدى خلتها
طبيعة النفس عن منوالها .. ما تحيد
لو إنّي اقدر . . على ( التبديل ) بدّلتها
كم لي وانا آجاهد الدنيا وأهلها وحيد
ما فيه حملة تقص الظهر .. ما شلتها
يا راعي الصدة .. اللي ما سبقها وعيد
متخيلٍ . . ( كل شيّ ) ، و مـا تخيّلتها
لا تحسب إن الرسايل عالقه فـ البريد
أنا كتبت ( الرسايل ) بس ما ارسلتها
من خوف لايضرب الوقت بيدٍ من حديد
أمهلت روحٍ . . تبي شوفتك ، و أهملتها
ولعيونك اللي يضيع ابها الكلام المفيد
أسهرت عينٍ طواها الشوق ، وأشغلتها
أنا طموحاتي بعيدة . . و راسي ، عنيد
ماأسمح من المستحيلة غير لا طلتها
رزقني الله ، بـ ( موهبةٍ ) مداها بعيد
تزاولت لي . . على دربـي ، و زاولتها
رغم إني أملك نوادر من عيون القصيد
تغريني اللي . . ( ليا هالحين ) ما نلتها
ماعندي أجمل قصيدة من قديم وجديد
أجمل قصيدة ، " قصيدة " ما بعد قلتها