في قعدة أنس و فرفشة و نعنشة بين الخوات
و على طواري السفر و الهوايات
قالت أختي : كل شي و لا أحد يقولي بالسفر خلينا نروح متحف !!
سكت
أنا قمة سعادتي و متعتي إني أزور المتاحف و المواقع الأثرية
حتى إذا باتسوق أميل للأسواق القديمة و الشعبية
مادري وين المتعة بالمولات المكررة كل المحلات ماركات عالمية ما تعبر عن البلد اللي تزوره
يعني قبل مدة طلع لي حساب انستا لبنت مصرية في الفيوم تصنع قطع فخارية فظيعة
تمنيت ازورها فعلا و اتعلم منها الصنعة و اشرب معاها شاي
كل الدول اللي زرتها لازم ازور متاحفها و حدايقها و شوارعها القديمة ومعالمها الأثرية
أول سفرة لي للدوحة أول يوم رحت المتخف الإسلامي
لما رحت لندن رحت أربع متاحف
أثاري أختي لما كانت معاي تجاملني
صح تذكرت إنها بنص الجولة قالت ترى تعبت بروح أدور لي كرسي أقعد أنطرج
عاد هالمرة قطتها بوجهي
شكلي كنت غاثتها بالمتاحف