الأماني قدم ناظر عيوني مثل طيف
والحظوظ العاثرة عذبت عمر انطوى

ما يحس بضيقتك غير من قلبه نضيف
صافي وأنقى من أنسام عذبات الهوا

والله إن الحزن له في وسط صوتي حفيف
شاربن من ضيم وقتن عاجز عنه الدوا

اشهد ان الفقد فارس معه شلفا وسيف
شيب عين اللي من الفقد والفرقا طوى

يامن الموت الحمر من وقف فوق الرصيف
ومن مشى في زحمة السير ياتيه الأذى

المواقف بعضها ما لها ند ووصيف
تكسر الرجل اللي في عزة وانهوى

والحمول الكايدة شالها المتن الصليف
ما تراخى يوم حاله من أحزانه ذوى

والمواقف في ابن آدم لها وقعن مخيف
عزتي للي تلوع به الهم وكوى

ليتها كانت علي مزنتن في فصل صيف
كانت ما ضرت خفوقن من الهم ارتوى

اه يا قلبن نزف دمع لين أصبح كفيف
كنه دقت نظرته صوت ذيبن لاعوى

دق بيباني ورحبت به ترحيب ضيف
متكل بالله ومنهو اتكل به ما غوى

رحمتك يا خالق الكون بالقلب الرهيف
في نهارن نجتمع به تحت عرشك سوا


ل أ.د تركي بن عبد الله السكران