البنات بعد الزواج نكسة أم نهضة ؟
السلام عليكم ورحمة الله وبركاته
الموضوع نسائي بحت 
>>> أبد ما تطرد أحد 
في وقتنا الحاضر أغلب البنات ماشاء الله متعلمات ومتفتحات على أمور كثيرة ومثقفات ومهتمات بأنفسهم بكل النواحي 
يعني التطور كان في كل شيء , مافي شيء أسمه بنت مو جميلة الكل قاعد يبرز نفسه بشكل أو بأخر 
الكل بعد الإنفتاح والتطور الكبير صار عنده نت منها أنتشرت طرق الطبخ والحلا وصار بكل سهولة أعرف أسوي أطلق حلا بدقايق والتعليم قل وما ندر من البنات ألحين ما تلقين عندها شهادة بكالريوس والكل وعىى لأهمية تدريس وتعليم المرأة فصارت الجامعة شيء أساسي لكن . . ضلت عندنا بعض القعد الجاهلية المترسبة وهو أنتقاص كل هذا بمجرد إنها لا تملك رجل ! 
لا ننكر أهمية الزواج ولا ننكر حاجة الإنسان له أبداً , لكن أنا أتكلم عن جعله محور الحياة وكأنه أن لم يحصل فالمرأة لا قيمة لها ! بعد الضغوط الخارجية والنفسية والإجتماعية صارت البنت تحت حصار
في كل مره يتقدم لها خاطب وإن كانت غير مقتنعة فيه 100%
وبما إنها بنت فـ يتم أختيارها ولا تختار هي , فتصير تحت خيارات محدودة
عكس الرجل الذي يقدر يتقدم لأي كان !
بعد هالموجز أغلب البنات يتزوجون سواء باختيارها أو مو باختيارها , عاجبها او مو عاجبها , زين مو زين اللي هو المهم تزوجت ! 
الأختلاف مو هنا الاختلاف الشخص الذي تتحول له المرأة بعد الزواج اللي أغلبنا ملاحظ هالشيء على نسبة مهي بسيطة من البنات 
فجاة البنت بدال ما يصير الرجل أضافة بحياتها يصير كل حياتها وما عداه غير مهم ولا له قيمة 
فنصادف اللي تركت دراستها والله لأن البطل ما يبيها تدرس وتطيع أمره
بحجة تخاف يزعل ؟ , يعني في مبالغة بأطاعة الاوامر يقولها أهجري
أهلك هجرتهم عادي فجاة تصير أمعة مالها رأي
نصادف اللي تنسى صديقاتها بنات خالاتها وفجاة تنسحب من المجتمع وتصير تلحق بس ورا أبو الشباب 
فيه مجموعة مو بسيطة تهمل دراستها وطموحها من بعد ما كانت تبي ماجستير ودكتوراه ألحين فاشلة ويالله تبي تخلص البكالريوس ويالله السلامة فيه بعد اللي كل النهار تبكي ! عمركم صادفتوها ؟ هذه عاد اللي بعلها سفيه ومغازلجي وكل يوم بديرة يراكض وما لقت له حل ولا تبي تطلق لأنها دايبه لخديداتها فأي كلمة لها راح تنفجر بكي 
. فيه نوعية بصراحة هذولي أفحمني , اللي ب5 سنين جابت لها 4 عيال وواق ويق وبكل مكان وراها يراكضون وبطنها واصل لخشمها والجسم مترهل وتحسين خسرت 20 سنة بـ5 سنوات , مدري منو قاص عليها وقايل لها هالحركة تحبب الرجال فيك ؟ 
طبعاً فيه بعضهم حباً بالخلفة ؟ لكن مهما كان يا أمي أرحموا أنفسكم ونفسياتكم عطوا أنفسكم وأجسامكم وعيالكم فرصة ! جسمك يبيله أهتمام بعد الولادة , ولدك يبيله أهتمام عالأقل سنتين , نفسيتك نفسها يبيلها نقاهه شوي . ما دري لكن صادفت وحده قايلها رجلها " الزوج اللي يخلي حرمته تجيب منه عيال واجد معناه يموت فيها " مع أن سمعت أن زوج المدعوه داشر في بتايا 
. فيه أيضاً نوعية بصراحة غريبة عجيبة واعتبرها الأخطر , اللي تقلب بعد الزواج منال العالم وألاحظ على هذه النوعية ما تخلي غيرها بحالهم , يعني تغير عليها حالها بعد الزواج وصارت تنكرف ما قلنا شيءهذا شيءراجع لنوعية حمولتك اللي اخذتيهم وكذلك نوعية بطن زوجك المصون 
. هذه بالذات تقلب محقق كونان للسناعة والنظافة , تلقينها بس تمدح بسنعها وأهتمامها ببطن المصون وملابسه وكيفية خدمته على الأصول وتمسح بالمخدات اللي مضيفينها يمكن تلقى غبره مني مناك فتبدأ بدرس السنع والعداله للي رايحه لهم , وتحقق عن علاقتك بزوجك وبعدين تبدأ الإنتقادات عشان توصل بالاخير " للسنع اللي هي اخترعته من مخها " عشان تحس بتمييزها بمجال النظافة والطبخ ! في المقابل مهملة نفسها على الأخر ما عندها أي خبرة بالمستحضرات التجميل ولا الملبس , إذا شفتيها تقولين جايه من بر ! بوركتي اختاه هذا سنعك ؟ فيه اللي تصير " خالتي قماشة " لزوجها ما عندها شغل غيره تعال أجلس معاي
لا تطلع من البيت , منو أخوياك , وين رايحين؟ , تحبني ؟ , مرتاح معي ؟ شرايك
فيني ؟ وتفتش جواله وتفتش أغراضة وتسأل عنه الناس وكانها تتجسس وتلقينه عاد
هو بالذات ما عنده ما عند الرجال من خرابيط لما تطفشه بحنتها ورنتها وصكتها عليه
فيكرهها ويطلقها وتالي تقول ظلموني !
يعني التغيير حتى بالمبادىء والطموح ومن غير الشخصية نفسها تتغير 
طبعاً انا ما أعمم أبداً فيه بنات معينات هذولي لا شفتهن ترد روحي وأستبشر خير فيهن وودي أصير منهن صراحة 
لاا تزوجت ما تغير فيها ولا شيء لا من مبادىء ولا قيم ولا شخصية ولا نفسية بالعكس تصير أفضل و تظل مع صحباتها وعلى اجتماعاتها واهتمامها بشكلها وطموحها ووظيفتها ووفوق هذا تكون معتدله حتى بشخصيتها مع زوجها ما تحسينها ذايبه ولا تدري وين الله قاطها مثل الحالات اللي فوق لأ 
تتكلم بعقل وقلب وباعتدال وتلقين حياتها فعلاً تنطبق عليها " الأعتدال " أو
خل نقول ماشية على مقولة " لا تكن قاسياً فتنكسر ولا ليناً فتنعصر "
فعلاً هنا ما يطري على بالي إلا وصف الزواج بالموده والرحمه بالقرأن
وما وصفه بالعشق والغرام , كذلك ما وصفه بالإستعباد لكن بالمشاركة !
أنا ماراح اتطرق للأسباب اللي تخلي بعض البنات يتحولون لهذه الشخصية بعد الزواج لكن ممكن يكون فراغ عاطفي يسيطر على البنت بعد الزواج فتتولد فكرة لازم أملي فراغي العاطفي كله بهذا الزوج ؟ وممكن أيضاً تكون الفكرة المجتمعية السائدة أثرت عليها فصارت فعلاً تطبق قول لا وجود لي بوجوده ؟ فتروح تراكض وراه بكل ما أوتيت من قوة 
الأسباب متعددة والنتيجة واحدة للأسف الموضوع شاغل بالي هالأيام نظراً لكوني عروس وبعد أشهر زواجي فخفت على نفسي اتحول من هالعينات 
كذلك مراقبتي للي حولي وكلهن من هالعينات اللي فوق خلاني أخاف زيادة 
الموضوع طبعاً نقاشي لكم حرية أبداء الرأي
نجي لبعض الأسئلة اللي فعلاً ببالي :
1- الزواج بمجتمعنا نكسة أم نهضة ؟ 2- العينات اللي طرحت سابقاً موجودة بكثرة ام لا ؟ يا ليت تقولين لنا بشكل نسبة مئوية ؟ 3- الأسباب بنظرك التي تؤدي إلى تغير الفتاة ؟ 4- هل مقياس التغير بالحب ؟ من احبت زوجها تتغير ومن لم تحبه هي التي تبقى على حالها ؟ " نظرية جدتي يا لاحق يا ملحوق يعني اللي يحب منهم الثاني هو المتعذب " 
5- عندك أمثلة بواقعك لـ فتيات تغيروا للأسوء ؟ 6- عندك أمثلة بواقعك لـ فتيات تغيروا للأفضل ؟ بالأخير الموضوع من منظور شخصي فقط لا غير وأكرر أنا ما عممت الموضوع نقاشي لكم حرية الرد .