ما تسمحيلي إني أحبك
وأفتح لك قلبي؟
أدخلي وشوفي
ولد صغير
بلا ألعاب
منزوع الطفولة
ولد
ما كانش فاهم الفولة
قلبه متعلّق
ما بين رحلة الخضار
وكارتون مازنجر
على قط وفار
ومريلة سنة أولى
أدخلي وشوفي
وانكشي في الصمام
هتلاقي كبشة حروف
بتخلق من النبض
حبة كلام
وشوية سلام
وشوية نصر
على شوية انهزام
أدخلي وشوفي
وحش شجاع
متكتف بتوب الخوف
لفة سواقي
ودهن العتاقي
وزمن ولّي
لا خلّي
لا طمبور
ولا شادوف
أدخلي شوفي
قلب مفتوح ع الحمّاد
بتلف جواه البلاد
زي الرحاية
وفرسان راجعين
بلا راية
وقلب عايش
برّايا
أدخلي وشوفي
سرداب
وأغراب
ونايات ورباب
ووهج هرّاب
وسراب
ويا ما في الجراب
أدخلي وشوفي
بلادنا الملفوفة
في توب القلق
بحر عيونها
مفتوح للغرق
وليل شبطان
في شعرها اللي اتفرق
واللي اتسرق
من شوية همج
قطاع طرق
أدخلي وشوفي
بسمة الشوارع
جنب ضحكة البيوت
صوت رصاص
وشباب بتهتف
في الميدان بحماس
وبيادة ميري
وشدة سريري
وبُنية حاضنة ضناها
اللي مات
وقنابل
بتهتك ستر السكات
وركن تاني
مليان أغاني
وأمل
عاوز بقلبك
يتصل
لو بس
تسمحيلي
إني أحبك