التين شجرة كريمة ، بس إنتاجها بيتظبط لما تمشي معاها بنظام مش بالبركة
لو عايز موسم تقيل وجودة عالية، قسم شغلك على محورين: تقليم صح + تسميد في ميعاده...
أولا: التقليم — شكل الشجرة = شكل المحصول
التوقيت الأنسب: في عز السكون، بين يناير وفبراير قبل ما العيون تتحرك
نضّف من تحت: شيل السرطانات والنموات المائية اللي بتاكل غذا على الفاضي
افتح القلب: خلي الشمس والهوا يدخلوا جوه، ده بيقلل الرطوبة وبيحمي من الفطريات
قصّة تنشيط: قصر الأفرع القديمة شوية، لأن التين بيحمل على نموات السنة نفسها
ثانيا: التسميد — أكل متوازن حسب المرحلة
في الشتا: اخدم بسماد عضوي متحلل + سوبر فوسفات + كبريت زراعي، تدفئة للجذر وتجهيز للانطلاقة
مع بداية النمو: زود نيتروجين وماغنسيوم عشان ورق قوي ومجموع خضري نضيف
وقت العقد: خفّض النيتروجين، وادخل فوسفور مع رشة عناصر صغرى (حديد، زنك، منجنيز، بورون)
في التحجيم والتلوين: البوتاسيوم هو الملك (سلفات أو سترات) + كالسيوم بورون عشان تمنع التشقق
نقطة الميزان
الري وقت التزهير والعقد حساس جدا. تعطيش جامد وبعدين غرق بيعمل صدمة ويوقع الثمار. ثبّت مواعيد ري خفيفة ومنتظمة حسب تربة الرمل عندك
الشجرة اللي في الصورة مطعومة، وده بيساعد في انتظام الحمل لو الأصل متحمل ملوحة....
