صار الوطن غربه وصـار السفـر دار
لــويــن مــــدري لــكــن لأي ديـــــره

مـن عـاش وقـتـه مايحـسـب لـلأشـوار
يـضـيـع مـايــدري تــوالــي مـصـيــره

للـنـفـس حـــد ولـــو تـعـدتــه تـنـهــار
مـاعـاد تـفـرق بـيـن خـيــرن وخـيــره

بعض العرب في جوفها علوم وأسرار
والله هــو الـلـي عـالـم(ن) بالـسـريـره

كـم واحد(ن)يشـرب قراطيـع الأمـرار
ولـكـن صـابـه مـثـل حـــب الشـعـيـره

وكم واحد(ن)لو صابـه أدنـات ماصـار
خـلـى الصغـيـره فــي عيـونـه كـبـيـره

اذا مــعــك ديــنــار قــــدرك بـديـنــار
مـــع أحـتـرامـي لـلـوجـيـه الـسـفـيـره

كـب الـدلال وصـك بابـك عـن الـجـار
وغـيــر مسـمـاتـك وخــــل الـعـشـيـره

تـلـقـى مـــع الـعـالـم مــعــزه وتـعـبــار
الطيب تال الوقت أصبح معيـره ..!!

مـاعـاد بـهـا الـوقـت حشـمـه ومـقـدار
لـو انــك أنــت شـيـخ فـخـذك وأمـيـره

المـال يغسـل مـن مــلا وجـهـه الـعـار
والفـقـر ذل أهــل السـيـوف الشطـيـره

يحـقـر الـلـي ماعـلـى سـاســه غـبــار
ويـعـز مــن شــان الـنـفـوس الفـقـيـره

الفـقـر قـصـر مــن طويلـيـن الأعـمـار
والـمـال طــول فـالأعـمـار القـصـيـره

هـذا الصحيـح ولـو تجيـبـون الأعــذار
عـذر أنسحـاب القـوم عـقـب الكسـيـره

المـيـت لــه دعـــوه وللـكـسـر جـبــار
والـهـرج مـاسـر الـجـروح الخـطـيـره

اللـي مشـى فـي عــزة النـفـس مـابـار
والـلـي يــذل الـنـفـس بـايــع ضـمـيـره

قـدامــنــا جـــنـــه وقــدامــنــا نــــــار
والـلــي بـغـيـنـاه الــهــدى والـسـتـيـره