إصعد سما وأترك هـل القـاع للقـاع
وأرفـع حجاجـك للنجـوم المطـلـه
وخلـك مثـل ماقيـل للعـزم بتـاع
مافيـه صعـب إلا وربـك يحـلـه
وأصبر ولا تبدي همومـك والأوجـاع
يشمت بك الحاسـد وعرضـك يفلـه
وخلك سوات طويق ثابـت ماينـزاع
ومهما حصـل لايتضـح فيـك خلـه
والرجل مايلطـم عيونـه بالأصبـاع
والحكـي مايرفـع عفـون المـذلـه
ومن خل في دينـه تـردى ولا طـاع
إبعـد عـن الفاسـد وجنـب محلـه
ترى الرجال أشكال وأجناس وأنـواع
مثـل المعـادن والمـعـادن مقـلـه
فيهـم مرويـن الهنـادى بـالأوقـاع
وفيهـم كريـم كـل ربعـه تجـلـه
وفيهم سديد الـرأي ويـدل الأسنـاع
حكمـه وحلـم والقـداء منهـج ٍ لـه
وفيهم هل الطاعـه وفييـن الأطبـاع
بيـض الوجيـه الديـن فيهـم جبلـه
وفيهـم لبيـب لوالدينـه ومـطـواع
بيـاض وجهـه ناصـع فـي سجلـه
وفيهم شريف صان عرضه عن الناع
ماوطـي بأقـدامـه ولا درب زلــه
ولا أنسى رجال العلم في كل الأوضاع
عماد الأمـه والوفـاء هـم هـل لـه
والباقي أحياء شبـه الأمـوات رتـاع
نقص ٍ على الحييـن فـي كـل ملـه
ياهيه ياللـي تطلـب العـز جـزاع
سلايـل الأمجـاد سـيـف وسـلـه
العلـم مـن يتبـع مباديـه ماضـاع
والديـن نـور مـن تـقـداه دلــه
والصدق فإن الصـدق كالبـدر لمـاع
وحفظ اللسان مـن الهـروج المزلـه
وترى المعالي دونهـا يقصـر أبـواع
ويطولهـا مـن صامـل القـوم قلـه
وحفظ الشرف والنفس عن كل الأطماع
يسعد بها الأنسـان فـي العمـر كلـه
هذا وأنا من كثـر ماشفـت مرتـاع
من وقتنـا اللـي كـل كفـو ٍ يذلـه
وصلوا على اللي بالهدى نوره أنشـاع
شفيع الأمـه والبشـر منصـت ٍ لـه