" وعليكم السلام ورحمة الله وبركاته "
اول شي الله يرحم امك ويسكنها الفردوس الاعلى ~
ثانياً : تصرفك عين العقل لما كلمتي خالك , وسحب الجوال منها..
نصيحتي لك : البنت عقلها صغيير وتفكيرها محدود ماراح تفهم عليكم بسهوله ..
امك رحمها الله تركت فراغ كبير وكون اختك اصغر شيء فـ هي اكثر وحده راح تحس انها وحيده ومحتاجه حب ووعطف , ودخلت عالم النت لانه هو الوسيلة المتاحه والمتوفرة ’ فيه من مختلف الاعمار وحبت تستكشف وتعيش مغامرته وبـ عمر أكبر من سنها وان كانت خطاء ألا انها جاهلة .!
تعليق ع جزء من كلامك :

دخلت على بريدها لقيتها تتواصل مع شخص اكبر منها 8 سنين وبينهم قصص خرافية < اتوقع فهمتوني


وش نوع القصص الخُرافية كم قالت له عمرها ؟!
هنا جزء من الحلقة المفقودة شوفي الرسائل وإذا لقيتِ مافي ولا معلومه صحيحة نقول الحمدلله !

وتعليق ع نقطة ثانية من كلامك :

وصارت تقولي ان هاذا الولد اللي يكلمها قال لها ابعثي صورك وان مابعثتيهم راح اجيب خبرك انا قلت لها شوفي مادام انك اعطيتيه كل المعلومات غلط ماراح يسوي لك شيء قالت لي يعرف عننا كل شيء وكمان يعرف بيتنا

اختك اظن انها بكاشة دام انه يعرفها وش يبي بصورها ؟! لو كانت فعلآ صادقة راح تلقين التاكيد بـ رسائل البريد ,,
شكلها متاثرة بقصص تسمعها ويمكن تكذب عشان ترجعون لها الجوال
وكذبت مرة ثانية لما قالت انه ساحبها وضربها ..!
الاطفال تفكيرهم محدود ويمكن تبغى تخوفكـم ألفت قصه ومثلت عليكم الدور ..
ع بالها وحسب تفكيرها انكـم بتخافون عليها وبترجعون لها الجوال عشان مايأذيها ..
مادرت انكـم بتسحبون ملفها من المدرسة وبتجلسونها فالبيت ..

عشان تتاكدين :
انا بقولك كيف تقدرين تسحبين منها الكلام ومن اخواتك كلهم وكمان تتقربين منهن أكثر :
طريقة انا كنت اسويها مع اخواتي الصغار وخصوصآ اختي 14 سنه > عساها ماتشوف الموضوع
اناديها تجي تجلس معي امشط شعرها اسوالف معها سالفة تسحب سالفه اكلمها عن نفسي لما كنت صغيرة
وكيف كنا انا وصاحباتي ايام المدرسة وبكذا كانت تحس براحة كـ بداية وتتكلم وتسوالف وتقول إلي فخاطرهـا بصدق وبصراحة لدرجة كانت تعترف لـي بأشياء عن صاحباتها وبلاوي بـ صور
قبل كان ماعندها جوال ع جوالي وكنت معطيتها الثقه كانت تجي تقولي شوفي صاحبتي وش تقول شوفي صورة إلي تكلمه تقول تحبه ~ كلام يخوف كانت تقوله لي
وانا كنت انصحها بس ماقولها ابعدي عنها لانها هـي بالمدرسة معها مادري عنها إذا تركتها او لا فكنت انصحها واقولها قصص بنات وش نهاية هالطريق انصحي صاحبتك فهميها وتقول طيب ,,
الآن طلعنا لها جوال ومايحتاج اراقبها لان هي تجيب جوالها وتاخذ راي توريني كلامهم وتسألني ويارب تحفظها لي ويحفظك لك خواتك يارب ~

المهم إذا اكدت لك انه فعلآ ضربها او اعتداء عليها بلغوا عليه ولاتسكتون
وياليت يكون الموضوع سري بمعنى بينك وبين اختك الصغيرة وخالك ~
اخواتك الباقيات لايعرفون وش صار عشان ماتصير بصمة عار لها ويعايرونها ويذكرونهها به ..

اختـك ترى بيضيع مستقبلها الحين بتحس بفراغ اكثـر بسبب الجلسة بالبيت ,, إذا تقدرين تاخذين ملفها وتنقلينها مدرسة ثانية وانتِ تودينها لين تدخل المدرسة وقت الصرفة تنتظرك تدخلين تطلعينها من المدرسة .!
تحملي مسألة وقت وحاولي تعوديها ع الحجاب وتحببيها فيه ..
المهم حاولي تشغلينها معاكم وتكلفينها بمهام تغسل معاك تطبخ تكنس حاولي ماتتركينها لحالها فهميها انها للحين صغيرة وهالتصرفات بيزعل ماما منها اسئليها انتِ بتحي ماما ؟ اجل لاعاد تكررين هالتصرفات ~
والجوال لاترجعونـه لها نهائياً البنت صغيـــــــــررره وقولي لخالك يفهمها انه باع الجوال وماعنده فلوس .
إذا الله رزقه وجاءه فلوس بيشتري لها احسن جواال ..
واذ طلبت جوال وحده فيكن اعطوها وقدام عيونكن شوفوا وش تدخل وش تسوي انتبهوا لها
اما تاخذ الجوال وتروح لغرفة لوحدها لااااا ,,
قولـي نشتري لك إلي تبين العاب عرايس بس جوال غالي مانقدر عليه خصوصاً هالفترة
وهـي طفلة بتمشي عليها ,,
ونصيحتي لك :
تسجلين لها بتحفيظ قرآن بتنشغل وممكن سبحان الله يتغير تفكيرها
وتعلق بكلام الله وتحب الله اكثر وتحاول تحفظ القرآن وتعرف ان هالعلاقات حرام وتنسى كل هالخرابيط ..

اعطفي عليها حسسيها انك مثل امها وانها مهمه عندكم بوسيها ضميها حافظي عليها وقولي لاخواتك كلهن يعاملونها برفق وحنيه اكثر وقد ماتقدرين انتبهي لهن ذي امانه والله يعينك عليها ..
ربي يحفظها ويحفظكن من كل سوء ويسعدكن ويوفقكن يارب