قصيده أعجبتني في معانيها
وأحببت ان اضعها بين أيديكم علها ترتقي لذائقتكم ..

قالوا علامك صامت وقلـت يانـاس
كثر الكـلام يقـل لاجلـه مقامـي

الصمت حكمه والحكي مصدر إفلاس
ولقيت في صمتي يزيـد احترامـي

الصمت له معنى وله ذوق وإحساس
مركب نجاتك في بحـور الظلامـي

ترى الرجل صوره من الراس للساس
ثـم يتبيـن جـوهـره بالكـلامـي

إما نطق في كلمـة ترفـع الـرأس
تضفي على شكله جديـد الاسامـي

وإلا يعـود معدنـه معـدن نحـاس
يرميه سهمـه بعـد ماكـان رامـي

لا صار عندك من ثمينات الألمـاس
خله بصدرك ليـن وقـت التمامـي

أخاف يطلعلك مـن النـاس بـلاس
وإلا سفيـه مـا يـرد السـلامـي

الله خلق خلقه علـى عـدة أجنـاس
*وكلـن يسوقـه مذهبـه للأمامـي

والله خلق بالطير قمـري وقرنـاس
ووقت الهدد ما ينغـزي بالحمامـي

لا جال في صدرك من الهم هوجاس
وعينـك يحاربهـا لذيـذ المنامـي

ونفسك عليله والفكر صار محتـاس
اترك طمان القـاع وارق السنامـي

عليك بالعالـي ليـا هـب نسنـاس
يبري الجروح الخافيـه والعظامـي

وخلك لربعك دايـم الـدوم نبـراس
وخص القريب وخص ولد العمامـي

خلك لهم في داجـي الليـل مقبـاس
وللصاحب أصدق من حقوق الغمامي

ربعك ذراك ليا لحق راسـك البـاس
قدم لهم شربك ولـو كنـت ضامـي

وخلك لثوب الطيـب والعـز لبـاس
واتـرك دروبٍ تنتهـي بالحرامـي

وفعل الجميل وواجب الضيف نوماس
ومن لا نفع بالضيق نفعـه عدامـي

بيت الكريم أبوابـه بـدون حـراس
وبيت البخيل يعـد مثـل الهدامـي

كلٍ بهـا الدنيـا نصيبـه بمقيـاس
ياخـذ نصيبـه لوجفـوه الأنـامـي

منـقـوووول