يا متعب الأقدام ماشي على وين
مـع جـرّة جاهـا العجـاج ودفنهـا
ارجع وعـدّ خطـاك وحـده وثنتيـن
واكبح جماح النفس والزم رسنهـا
لاتامن الدنيا تـرى وضعهـا شيـن
ماعـاد بـه دنـيـا صحـيـح بدنـهـا
لاصاروا العقّـال مثـل المجانيـن...
واصبح ردي العرف يامر وينهـى
انـا مجـرّب والتجـارب براهـيـن
اراهـن الأيـام واكـسـب رهنـهـا
منها عرفت الفرق بيـن الفريقيـن
سبحان من صاغ العقول ووزنهـا
وان كان صح ان التجارب براهين
ضمنتهـا لـن كـان ربـي ضمنـهـا
رفقة ردي المعرفـة بعتهـا ديـن
علـى زبـونٍ ضمّـهـا واحتضنـهـا
بغى يجيني بالثمـن قلـت بعديـن
امسك فلوسك لين ننشـدك عنهـا
مابعتك الاّ سلعةٍ يا احمـر العيـن
ابيعـهـا وابـيــع حـتــى ثمـنـهـا
والله مبي فيها الثمن لو قرشيـن
بـس المهـم انـي تخلصـت منهـا.