السلام عليكم ان شاء الله تكونو كامل بخير
اليوم جبتلكم كلمات لاغنية شعبية من التراث الجزائري للراحل الفنان القدير كمال مسعودي نحبها بزاف
عندها معاني كثيرة تحكي على الواقع الي رانا عايشينو
ان شاء الله تعجبكم
( هي بالهحة الجزائرية لكن لو تدققو في الكلمات راح تفهموهم و اذا مافهمتو اي شي خبروني و انا رح اترجملكم ان شاء الله )
بسم الله

يا حسراه عليك يا دنيا



يا حسراه عليك يا دنيا فيك حكايه و حكايات ... ساميني و قعدي حدايا (جنبي) و حكيهوملي بثبات

علاش هكذا حاقدة و سمية ظلي تبدلي في الصفات ... تعذبي فيا غير بالشوية عييت من عذابك براكات


يا حسراه عليك يا دنيا


تلعبي بيا و لا معايا، جاوبيني علاش هاذ السكات ... قالولي عليك مسرحية، و أنا المسرح سكنلي في الذات

التذكرة خلصتها غالية ديت معايا شي وردات ... دخلت القاعة صفقو عليا، طلع الستار و الضو طفات

لقيت روحي في تمثيلية، و الديكور خوف و دمعات ... طمعتيني و درتي عليا، عندي جدي بصح (لكن) مات


يا حسراه عليك يا دنيا


شحال من سلطان كان في دنيا، جيوش لأمرو طيعات ... مال و عز قصور و سرايا، العسة عليه بالألوفات

غفل غفلة تقلبت الحية (الحال) حليلتو ما صاب وين يبات ... وكلتي فلان عسل و فاكية، و فلان شمختيلو (بلل) الفتات

فلان قلعتيلو (نزعتيلو) الذرية، و حياتو من الفرحة خوات ... فلان طلق مرتو المسكية، زعف (زعل) كي جابتلو الولاد


يا حسراه عليك يا دنيا


المسجون يرجى الحرية، بالدقيقة يحسب الأوقات ... الشهار (الموظف) يحلم بالشهرية( الراتب) يا حليلو مولى وليدات

كبدة لميمة (الأم) مشوية، على واش سهرت و واش ربات ... على ولدها بدل الجنسية، عجبو زين الروميات ( الاجنبيات)

خلى يماه وحدانية، من الحرقة و البكا تعمات ... باش (من أجل) يبين الرجولية بعثلها زوج محرمات (غطاء الراس)


يا حسراه عليك يا دنيا


نهار كانت الدنيا دنيا الوالدين علقولهم شيعات ... اليوم الوالدين راهي مرمية في مراكز الشيخوخات

انتي دنيا يدك زهرية، و أنا يدي فيها الكيات ... مع الواقف درتي جمعية، سماها دخلات و خرجات

القليل (الفقير) بعثتيلو خطية، جا يصلي تلفتلو (نسي) الصلاة ... كي (لما) سلم نسى التحية، كي تحا نسى زوج ركعات


يا حسراه عليك يا دنيا



المال فاني و العظام راشية، فاتت أجناس و تمحات ... اللي كان تقي و دار (عمل) النية طاع ربي و شد (مسك) في الصلاة

درجتو في الجنة عالية، صفة الجنة درجات ... و الشقي يمضي النهاية، ذاتو بالنار تكسات

جلدة رايحة و جلدة جاية، يظل يبدل في الجلدات ... نصيحتي نتركها التالية (الاخيرة) باش نختم بها الأبيات


يا حسراه عليك يا دنيا


دعوة الوالدين رسمية، منهم الشر و الخيرات ... الهناء كنز و الصحة غالية، و الباقي كلو كذوبات

ياسين ارسلها تحية، و امضى فيها بشي دمعات ... بعثها لكمال مسعودي برية (رسالة)، قراها بأوتار و آلات

و الصلاة على نور عينيا، سيد الخلق يا سادات ... شكون (من) نجا منك يا دنيا، غير اللي طلقك بالثلاث



يا حسراه عليك يا دنيا فيك حكايه و حكايات ... ساميني و قعدي حدايا (جنبي) و حكيهوملي بثبات

علاش هكذا حاقدة و سمية ظلي تبدلي في الصفات ... تعذبي فيا غير بالشوية عييت من عذابك براكات

https://www.************/watch?v=bOmKtGcNKdA

ااااييييييييييييييييييييييييييه يا حسراه عليك يا الدنيااااااا