دروب التغلي..
زعل وروح وخليته على فاله
نفسي عزيزه من الناس وترجاها
مع أني أغليه بس أن جاتنا الحالة
حتى المسجات لطرش ما نقراها
أخاف لارد رد يقطع وصاله
وانا أتجنب جروحه وأتحاشاها
ياحظ كبد المريح السالي الداله
الي ماجرب معاناتي وعاناها
قد قال حبك لشخصي ويش مثقاله
ثم قلت كثر النجوم وقال ماشواها
ياجعله الزين وشالي على باله
ياشين نفسه علي ومصعب رضاها
متعود أن غاب يرجع واتلقاله
واصبله من عروقي ويتقهواها
واليوم غايب ولكن ماهو بشلاله
انه نوى نية الفرقى وسواها
الله يسمح وفاه ويلعن الحالة
الي تحد النفوس البيض لأقصاها
خابره لاراح مني عود لحاله
وأثره من يوم قادر حطه إياها
قد لي أسابيع من صوته ومراسله
لكن دروب التغلي عارف دواها
والله مايشوف رقمي وسط جواله
الين يبكي عيون ويترجاها