بي منكم تنصحوني وحطوا انفسكم مكاني وحاولوا تجيبوا لي حلول .
انا ذكرت في العنوان اني احب ولد عمي .ودكم تعفون اكثر انا بقول كل شي في صدري . ابي افضفض عن نفسي لاني اعاني بشكل لا يعلمه الا الله وابي منكم النصح . الكلام اللي بقوله ما عمري قلته لاحد حتى اعز صديقاتي ما عمري قلتلها .
انا بنت عمري 23 سنة توني خلصت الجامعة وحلوة ومؤدبة واالحمد لله اخاف الله واصلي واعرف حدود ربي . بس انا احب حب شريف وعفيف وفيه براءة اطفال . اللي احبه هو ولد عمي . احبه من يوم حنا صغار . انا ابوي وعمي ما خذين خوات يعني زوجة عمي هي خالتي والعلاقة بيننا جدا قوية .
ولد عمي اكبر مني بسنتين هو الحين مدرس حبي له بدأ قبل حوالي 15 سنة . اذكر يوم انا عمري 8 سنوات كان يلعب معاي واذكر انه طيب وحبوب وهادئ .
من يوم صرت بسادس ابتدائي صرت ما اكشف عليه بس كنت دايم اشوفه بالذات في الاعياد وهو محترم جدا وخجول ما يحط عينه بعيني ويصد لا شافنا بعباياتنا انا وخواتي .
ظليت احبه من يوم انا صغيرة واذا أنذكر اسمه قلبي ينبض وارتجف واحمر بس احاول ما ابين عشان اهلي ما يحسون او اذا كنا مع خالتي وبناتها ما يحسون ان فيني شي .
انا بديت اتعلق فيه وبالذات في الثانويكنت دايم افكر فيه واتخيل صورته وكنت احاول اعرف عنه اشياء واكون حريصة لو اخواني وابوي ذكروا عيال عمي اركز معاهم احاول اعرف شي عنه .

فيه اشياء كثيرة شدتني فيه اولها يوم حنا صغار ونلعب مع بعض ويوم كبرنا اذكر مرة في العيد قبل 5 سنوات شفته وهو مشخص بالعقال كنت انا بثالث ثانوي وهو وقتها بالجامعة . المهم يوم شفته ما صدقت انه هو . تغير شكله . شفت رجال وسيم وحبيته اكثر والصدق ان وسامته ماهي سبب حبه لاني كنت احبه قبل وهو صغير ولا كان بذيك الوسامة . انا كنت غصب عني اطاع فيه وهو ما كان يدري عني لانه كان يكلم ابوي وحنا في السيارة ولا يشوفني من خلف القزاز .
هو الحين له سنة مدرس الصراحة اني فرحت بشكل ما تتصورونه يوم تعين مدري ليه ممكن حسيت انه في اي لحظة بيخطبني .
انا مصاحبة بنت عمي كثير واكلمها باستمرار وهي حبوبه وطيبة وممكن اني صاحبتها زيادة عشان اخوها بس والله هي طيبة المهم كنت ولا زلت احب اخذ منها معلومات بشكل عادي بدون ماتحس بس هي ذكية ومرة قالت لي فلان وتقصد اخوها تقول عنه هو ما يحب العايلة ولا يودينا اسواق ولا يخرجنا وتقول عنه بيتوتي .
انا ارتبكت وضيعت السالفة . مدري اللي قالته صدق والا بتشوف ردة فعلي .

الحين ابي منكم تنصحوني وحطوا انفسكم مكاني ولا ابيكم تظنون بي الظنون انا بنت محترمة واخاف الله بس الحب ما هو عيب .
انا الحين انتظر اللحظة اللي يخطبني فيها بس خايفة تطول واخاف يخطب وحدة ثانية والله انجن . واخاف اني اعنس وانا اتحراه . انا انخطبت كذا مرة حوالي 9 مرات ونت دايم ارفض بحجة الدراسة وامي تقول ادرسي واتزوجي وانا اقول الزواج بيشغلني عن الدراسة الحين بالصيف هذا تو واحد خاطبني من قبيلتنا وابوي هالمرة كلمني بنفسه ويحاول يقنعني هو وامي واخواني وحسيتهم بيقولون اذا رفضتي بتبقين عانس . الحين قولو لي وش اسوي انا لو ادري ان ولد عمي يحبني ويبي يخطبني والله استناه بس اخاف انه ما يدري عني وفي معاناتي واخاف ان الحب يكون من طرفي انا .