السلام عليكم
مشكلتي يمكن تافهه بنظركم بس انا مضايقتني ومآثره كثير وأحيانا والله ابكي منها

من صغري لما كنت العب مع اخواني تعرفون يصير طقاق عادي بين الاخوان ع لعبه او شيء بس معنا كان أبوي يسحبني من بين اخواني كنت السبب او لا كنت معهم باللعب او ما كنت معهم و يحرقني بالنار بيديني لدرجة مره مالي علاقه وما كنت معهم بس لان اختي بكت جاء لي ع طول و حرقني لدرجة جلدي حسيته ذاب بعدها صرت اكره اللعب مع اخواني او غيرهم صرت لحالي اجلس او ع دروسي وصار ما يحرقني بس يضربني بالعقال اذا بكوا يعني تطلع فيني حتى وانا مو معهم طبعا غير الكلام علي من كنت صغيره مره قلبي اسود غيوره.


كنت بالمدرسة اطلع الاولى و بتفوق و كنت اذا جيت ياخذها و يقطعها قدامي عشان ما اضايق اخواني.

اذا اشتريت لي لبس او شيء او تجهيز العيد تجي اختي تبيه كنت أعطيه لها بس عشان ما يقولي غيوره انانيه واجلس بدون شيء عشان اثبت له أني مو انانيه وقلبي مو اسود .

اذا جلسنا نسولف كلنا و اتكلمت غيّر السالفه و قلبها يتكلم عني وعن قلبي الأسود و أني حقوده و غيوره

لما كنت انخطب كان يرفض ويطلع بكل واحد عيب وانا صدقت ماتوقعتها توصل لكذا لحد مره سمعته مع اخوي يقول وانا غبي ازوجها وهي باقي لها سنه وتخرج واوظفها واذا خذينا البطاقة لو يجيني سكران عطيته


ما يناديني الا بسب ما عمره ناداني باسمي المشكله مو هنا اخواني صغار و كبار صاروا ينادوني نفسه يعاملوني زيه حتى يرموني باي شيء او يضربوني ومااقولهم شيء لان لو تكلمت علّو اصواتهم وجاء و زاد علي بالضرب وانا الغلطانه و الغيورة

تخيلو ع اكل من برا جيت أخذ طلبي جت دفتني و اخذتها طبعا مااتجرا أسوي اي شيء الا أكلمها قلت حقتي هذي جلست تصرخ علي و تهزأ أبوي كان موجود جلس يصرخ علي قدامهم و بعدها العقال علي
طبعا آكلي لما اطلب انا اللي ادفعه حتى الشغاله يدفعوا عنها انا لا لبسي جوالي شحن كل شيء مصروفي تعطيه لي جدتي من صغري لحد الحين لانها تعرف أبوي كيف معي حتى بمستشفى ما يدفع لدرجة احس لو ما جدتي كل فتره تعطيه 5000 و10000 مسكني باب الشارع ، اصلا انا اركب مع سواق يوصل للجامعه اختي يوصلها ابوي او اخوي

وربي مو قاهرني و مضايقني الا اخواني وربي كلامهم يجرحني وأسلوبهم غير ما ينادوني الا بالفاظ و يا المحترقه عشان حروقي اول و ربي يأخذني أني احترمهم صغيرهم قبل كبيرهم ومااقلل منهم بحياة عمري ما رميت كلمه او قليت ادبي او ضربتهم
حتى صغيرهم قبل شوي اختي عمرها 14 جالسه تصرخ و ترمي علي الفاظ و تضربني وانا مو قادره حتى أكلمها وانا اقسم بربي كنت ماره و ما كلمتها و ما اتطلعت فيها بس لتضحك خواتي

ابي بس يحترموني لا يحبوني بس يحترموني ك كائن حتى الشغاله اللي مو من اهلي لما شافتني ابكي من اختي بكت معي و الباقي بس يتفرجون

وربي تعبت ماعاد فيني أتحمل الحق العالم برا ولا الحق اهلي
وربي استثقل كلمة أبوي أنطقها قدّامه او قدام احد ماابي منه لا يحبني و لا يدلعني و لا يكون معي زي اخواني بس يعاملني كإنسانة

وامي اي مصيبه تسويها او اخواني تحطها فيني عشان ما يقولهم شيء و اليوم اللي تعاملني باحترام اعرف ورآه طلب عطيني فلوس او اروح أكل عنها تهزيء او عن اخواني واذا جلسنا تقلب علي فجاه و تبدأ صراخ و انا ساكته مالي علاقه و لا أكون متكلمه حتى


قولوا لي وش الحل وربي تعبت
امانه لحد يدعي عليهم لا برده و لا بقلبه امانتكم لا تدعون عليهم
ورب الكعبه ما كذبت بحالي ساعدوني وش أسوي