.




.

بنت الأصول اللي على الدين شبت
............... تشيب ما وطت لغير الله الرأس

انحبت ومثل المخاليق حبت
............... ما هي قليلة حظ لكن من الناس

البارحه ريح المقادير هبت
............... وضاقت على وسع الفضاء ذيك الأنفاس

دعى الفراق وجمرة البعد لبت
............... الحزن واقف والشقاء دق الأجراس

ياخيبة اللي بين الأضلاع ربت
............... حلم جميل ومات في لحظة نعاس

أقسى شعور : " يكون قلبك مثبت "
............... وتزلزله صدمة وهو حيل حساس

كذا تكون اللي بكت واستخبت
............... تبي تلم الجرح جابت له الفأس

لكن مع هذا اصمدت واستحبت
............... تكون أكبر من عنا الجرح واليأس

طاحت قويه والظروف استتبت
............... وقامت قويه وأدمحت غلطة البأس

كذا تكون اللي على الدين شبت
............... تموت ما وطت لغير الله الرأس



* أميرة الجابري ...