الحلقة الثامنة


وصلت الرياض .. والقرار عندي شبه تبلور .. وصار عندي شعور بان المسألة محتاجه الى تفكير جاد ..
في اليوم التالي اتصلت على الدكتور ..
- السلام عليكم ..
- وعليكم السلام ..هلا اخوي ناصر ...
- السيارة يا دكتور طلعتها من الصناعية ويمكن ترسل السواق في أي وقت يأخذها
- الله يجزاك خير .. والله تعبناك يا اخوك ..
- ما فيه تعب الله يحفظك يا دكتور .. على فكرة .. دكتور انا الحقيقة ودي اقول لك ... .......
- وش فيك ساكت .. قول ..
- المسألة يا دكتور ... يعني ... اقصد ..
- وش فيك يا ناصر .. اذا كان الموضوع علشان الزواج .. قول بكل صراحة .. ودك والا ما ودك ..!!؟
- والله يا دكتور ودي .. بس ودي اقول لك ان السؤال مهم بالنسبة لي ولكم ..
- طبعا يا ناصر .. من حقك تسأل .. ومن حقنا نسأل ..!
- اوك ..
- بس خلني اللحين افاتح اختي مناير ... واشوف ..!
- طيب ...


انا توقعت انه ينهي المكالمة ثم يسأل أخته وتفاجأت انه ينادي مناير وانا معه على الجوال ..


- مناير .. مناير ..
واسمعه يقول :
- مناير .. جايك عريس تقبلينه والا لا ..!!
واسمع ردها تقول ..
- سلامات .. من أي سوق جبته ههههههههه
وجلست اسمع الحوار التالي :
- جبته لك من سوق الرياض .. ويقولون عليه خوش رجال ...
- انت من تكلم .. اكيد هذي سميرة ..
- ايه هذي سميرة بنت عمك تقول انها لاقيه لك عريس ..
- قل لها تلقى لنفسها اول .. وبعدين تفكر فيني ..ههههههههههه
- لا .. لا .. امزح عليك الله يهداك يا مناير .. هذا ناصر ..
- نااااااصر .. وش تقووول ..!!؟؟
- ايه ناصر راعي الرياض ..
- اقول .. بلا سخافة عاد .. كل يوم لك شئ تلعب علي فيه ..
- اقول لك هذا ناصر معي على الجوال يطلبك للزواج .. وش رايك ..!!؟
- اقول يا سعود .. كفاية غشمره .؟....... وما لها داعي ..
- خذي كلمي الرجال ...
وفعلا .. عطاها الجوال ...
- الوه ..
- هلا .. هلا ..
- مين ..!!؟
- انا ناصر ..
- ناصر .. ناصر ..
- ايه ناصر ....


وشوي ... شكلها رمت الجوال على أخوها الدكتور


واسمع الدكتور يضحك ..
- هههههههههههههههه شف رمت الجوال وانحاشت البنت ههههههههههههههه تستحي .. عموما يا ناصر .. الله يتمم على خير .. راح اسألها سؤال زين وبعدين ارد لك خبر ... في امان الله
- في امان الله يا دكتور ..
انتهت المكالمة .. وبدأ عندي شعور غريب وتحليل للموقف اللي صار .. وكنت اقول في نفسي وش هذي الاريحية عند الدكتور .. ودارت في بالي عدة اسئلة ..!!؟


· ليش الدكتور يعرض اخته علي ..!!؟
· وليش انا مو واحد ثاني ..!!؟
· وليش .. وليش .. وليش ..!!؟؟؟؟



وكثرت عليّ الاسئلة .. واشغلتني الاسئلة والتحاليل ....
في اليوم التالي .. اتصل عليّ الدكتور يعلمني انه أرسل السواق علشان يأخذ السيارة .. .... ...

وبعد ايام اتصل عليّ الدكتور ...

- السلام عليكم
- وعليكم السلام ... هلا ومرحبا دكتور
- هلا استاذ / ناصر ..
- الله يحييك ...
- استاذ / ناصر .. للاسف .. شكل ما فيه نصيب بيننا وبينك .. اختي / مناير رافضة فكرة الزواج في هذا الوقت .. عموما .. انت الف وحدة تتمناك .. والله يوفقك ويسهل امرك ...



الحقيقة بعد ما قال لي هذا الكلام .. انصدمت وتأثرت نفسيا .. لانني سبق ان قررت مع نفسي بان استمر في موضوع الزواج بشكل جاد وان ابحث في هذا الجانب ...!! وشكلي معجب في [ مناير .. ] .. لا والله اللي رايح فيها ...



تداركت الموضوع وقلت :
- الزواج قسمة ونصيب يا طويل العمر .. وكلن له قسمة في هذه الحياة .. والله يوفقها ويسعدها ..
- انا اسف .. عسى ما سببت لك ازعاج بهذا الخبر ...!!
- عموما .. انا كنت ناوي أقول لك اني كنت أتمنى أكون نسيبكم .. وكان يشرفني اني ............. [ قاطعني .. وقال ..]
- ههههههههه وما فيه مانع تكون نسيبنا وتجي تخطب اختي مناير رسميا هههههههههههههه
- وش تقول يا دكتور ..!!؟؟
- انا اقول لا تهمك اختي مناير .. حتى لو ترفض .. انا شاري رجال ...
- لا .. لا.. يا دكتور .. مناير لها حرية الاختيار .. ولا تغصبها على شئ ما تبيه ...
- لا تهمك .. هذولا البنات ما يعرفون مصلحة انفسهم ...
- عفوا .. يا دكتور انا ما اتزوج بهذا الاسلوب ... والله يوفقهم بزوج يسعدها ويصلح لها ...
- يا استاذ / ناصر ترى كل الكلام اللي راح مزح .. ههههههه .. واختي مناير موافقة على الزواج منك وسألنا عنك .. وانت كفو من يناسبك ...
- هاااه ... وش تقول ..!! صدق يا دكتور ...
- ايه صدق .. ومتى ما بغيت الله يحييك انت واهلك تجون تخطبون مناير ...
- اممم .. بس ..
- ايش بس ... ادري .. ادري .. يمكن انك ما سألت عنا .. على راحتك اخوي ناصر اسأل وتطمن ومن حقك وبعدين اتصل عليّ .. عطني قرارك ... وتأكد بان قرارك سواء كان ايجابي او سلبي لن يؤثر على صداقتي معك .. الله يوفقك ..
- تسلم يا دكتور .. والله العظيم باسلوبك .. تعطيني مجال كبير .. وارتاح نفسيا ..
- لا يا اخوك هذا زواج مو لعب ...
- تسلم يا دكتور .. انا ان شاء الله عن قريب اتصل فيك ..
- لك الوقت .. وقرارك عندك يا ناصر .. الله يحفظك
- تسلم ... ان شاء الله نتواصل قريب
- ان شاء الله ..
- في امان الله ..
- في اما ن الله يا اخوك .. مع السلامة


انتهت المكالمة وكدت اطير من الفرح بهذه المكالمة ....
واااااااااااو ... انا راح اتزوج [ الدكتورة مناير .......................] يا سلاااااااااااااااااااام

وفعلا .. بعد ما انتهت المكالمة رحت اسأل في كل اتجاه عن عائلة الدكتور / سعود بن فهد ..
وجميع من يعرف الدكتور كان يثني عليه ..


الا واحد من الزملاء في فرع سابك بالجبيل ..
قال لي بالحرف الواحد

- اسمع يا ناصر انا ما اعرف الدكتور / سعود ولا اعرف عائلته .. بس .. اللي اعرفه في الحياة وتعلمته بعد ما تزوجت من زوجتي الحالية .. ان فيه امور كثيرة .. يجب مراعاتها .. مثل تكافؤ النسب .. تكافؤ العلم والشهادة العلمية .. تقارب العمر بين الزوج وزوجته .. ولا يكون هناك اختلافات كبيرة في الثقافات .. ولازم تعرف هل البنت كثيرة حكي .. هل البنت حنّانة .. هل البنت راعية اجتماعات مع قريباتها .. هل البنت ملتزمة بالدين .. وهل البنت تسمع اغاني وتشوف افلام .. ولا اخفيك فيه امور اكثر .. مثل هل البنت تحب النظافة وتحب العطور .. يعني هل هي تنظف اسنانها دايم .. تنظف جسمها .. تحب النظافة بشكل عام ..
- يا ماجد .. كيف تبغاني اعرف كل هذه التفاصيل الصغيرة .. وبعدين انا اشوف هذه التفاصيل يمكن تداركها بعد الزواج حتى لو فيه اختلاف ....
- لا لآ..لآلآلآ. صدقني ومن خلال تجربة ...أي عادة يمسك فيها الانسان في حياته يصعب معالجتها او التخلص منها .. لذا تأكد بان العادات مثل العبادات واكثر .. انتبه لا تبهرك مسألة الزواج وتأخذ الامور بشكل سريع .. انتبه .. انتبه ..
- يا اخي لو كل شخص طبق كل اللي تقوله ما احد تزوج ههههههههههههه
- عموما انت طلبتني النصيحة .. وهذا انا اقدمها لك .... ويكون في علمك المفروض البنت تسأل عن تفاصيل الرجل ... مثل ما يسأل عنها ... يعني هل هو مدخن .. هل يسافر كثير .. هل .... [ قاطعته ...]
- يا رجال انت شكلك بتّطيح سوق الزواج ههههههههههههههه
- ههههههههههههه .. لا لآلآلآ .. انا اقول الزواج ... عمر وحياة .. ويجب ان يُدرس من كل الجوانب .. وفي النهاية ادعو لك بالتوفيق ...
- شكرا على نصيحتك .. وادري انك حريص على مصلحتي .. الله يعطيك العافية



انتهى الحديث بيني وبينه .. واشعر بان كلماته كانت صادقة .. بس انا فعلا كنت مبهور بمسألة الزواج وكان تفكيري الوحيد – المكان اللي بيجمعني بمناير .. وكانت تفاصيل المكان واللحظات الحميمة .. اكبر اهتماماتي .. وهكذا كان تفكيري ..!!