قريحتي عودت للشعر مجبوره
تسوقها شرهتي للصاحب الوافي


انقابله بالوفا ونراعي اشعوره
واليوم مدري وش اللي صار ياكافي


اما يبين لنا ونشوف منظوره
اناقشه وانتوصل حل وانصافي


كلن يخاطب حسب عرفه ومقدوره
والناس تلقى بها من كل الاصنافي


الطيب انعامله بالطيب بحضوره
وان غاب ننشد ولانرضى له اخلافي


والا الردي ينحدر مع كل حادوره
دايم علومه تجي هزلات وخفافي


مانستمع كل من يبدي لنا شوره
واحذر وجنب عن المشبوه والهافي


والرفقه اللي ماهي للوقت مذخوره
احسن توقف قبل لايكشف الخافي


الوقت ياما يدور ودورته دوره
تذكر المعتبر وتصحي الغافي


والبارحه لاح لي براق بنشوره
يوضح اللي خفى من دون كشافي


مر وتعدى وكلش بان بالصوره
واللي عيونه تشوف يقول ماشافي


ادري وعرف الزمن له ميله وجوره
ان راف لك يوم باق*الوقت*مارافي


والا الجبل راسي(ن)ماهتزت اصخوره
لو الليالي تمره شهب وعجافي


عليت نفسي عن التقصير والبوره
وغرفت مالاق لي من مشرب(ن)صافي


اقلط وتلقى الشحم ودلال مسطوره
في مجلس(ن)للخوي والضيف واللافي


فيه السعد والشتايم عنه محضوره
وعز الرفيق الذي للطيب حوافي


هذي رساله عن التخصيص مقصوره
قصيدة(ن) تعتلي في راس مشرافي


|| سراب الشعر ||