اعتقد اني بدأت اتأقلم مع المنتدى واحاول اكون عضو فعال
لكن مهما تجولت في جنبات المنتدى ضروري اكتب في مدونتي
المجهوله .. عموما مو مهم ان كان في ناس تتابعني اهم شي
اكتب ..
بقول لكم سالفة :::
الاسبوع هذا كان عندي دورة تدريبيه وكنت شايل همها
والسبب ان مافي احد اعرفه حتى امضي وقت الدوره بالسوالف
المهم رحت اول يوم وانا ماعندي اي مزاج لها وايضا متأخر
سألت موظف عن مكان الدوره فقال لي يسار ثم يسار ( وصف ممتاز )
سويت نفسي فهمت واروح احوس المبنى كله وماحصلت القاعة
واتأخر زياده وبعد ما يأست رجعت سألت مره ثانيه واخيرا وجدتها
دخلت والقى القاعة مليانه , طيب وين اجلس لكن سبحان الله ربي سخر لي واحد من المتواجدين
وقال تعال اجلس هنا طبعا جلست بالكرسي اللي جنبه و عرفت عن نفسي لان وقت دخولي
كان تعارف بين المتدربين ..
بدأنا البرنامج ولحسن حظي كان عندي معلومات جيده بخصوص المواضيع اللي يتكلمون عنها
فكنت كل شوي مداخله واتكلم مدري وش هالثقة اللي فجأه صارت عندي
ومن كثر هذرتي الشخص اللي طلب مني اجلس ع الكرسي شاف اني ذكي
وعندي خبره لا يستهان بها وصار يسولف معي و طلعنا فطرنا و نتناقش في موضوع البرنامج
وطول ايام الدوره اجي متأخر الاقيه مجهز مكان لي جنبه
وبعد ماانتهينا قال الصراحه ابي اتواصل معك انت راح تفيدني قلت عادي
واحسه شاف اني عبقري زماني مادرا ان الملل اللي حسيت فيه من البرنامج
كان الدافع علشان اتكلم عند المدرب ..
الاحد باءذن الله عودة للدوام واعمال كرف