انا بحكي من اول يوم جيت لدنيه قذره وتكرم عن قذارتها بيوت الله ومعموره
انا ياحضرة السادة غريب وضاع من صغره لعن جدي زماني بين مدهوره ومهجوره
حملت من الشقا ما لايطاق وجايكم ذكره ولاني عاجز اتحمل واموت بنفس مقهوره
وانا ادري يذبح الرجال كثر الصبر في قهره وعن قهر الرجال المصطفى حذر ومذكوره
وهم قالوا مفاتيح الفرج للحي في صبره وانا اشوف الصبر مفتاح ضاع وزاد طابوره
تعبت الملم ايامي بيدين الهم والحسره تعبت المع البرواز وامسح غبره الصوره
تعبت ابوس كف الجوع وخشم الفقر طال عمره تعبت اكذب على الحاجه واقول الحال ميسوره
تعبت احمس من القهوه واحط السمن والتمره تعبت ودلتي وحده وكل شوي منثوره
منو فيكم وطاه الجوع وذله وصفقه فقره منو فيكم عرف يحتاج للثمه ونشف زوره
منو فيكم من الضيقه حفر بأصابعه قبره منو فيكم رقد ليله وسط اجساد مقبوره
منو فيكم مشى حافي برمضا كنها الجمره منو فيكم سهر ليل الظلام بدون أبجوره
منو فيكم ماطاح الفين مره وسلمت الجره وانا من قبل اطيح وجرتي بأيديني مكسوره
لكم الماء والوجه الحسن والمال والخضره ولنا حنا الظما والجوع وفقر وشيفةٍ عوره
ولامره حظي ضحك بوجهي وأشكره مره وغيري مبتسم حظه وكل ايامه مسروره