نسيت أو تناسيت
لهيت أو تلاهيت
ابتسمت أو تبسّمت
بكل الأحوال يبقى السؤال عنوان كل مرسال : تحبني ؟
ما أحتري جواب ..
و لا باقي في نفسي عتاب ..
من بعد هالسكوت ..
و شح نفسك عن السؤال و الوصل لاجل خاطر قلبي .. و ذيك الايام ..
صرت أجاوب نفسي ..
و ابتسم ..
و في العين دمعة أغلبها و ألف تنزل .. تغلبني ..
و اقول : مو مشكلة باجر يبرى قلبي .. و ترضخ النفس و لا ملام .. لا ملام
و اذا لي في الدنيا شقا أطول من هالشقا ..
لا تشقيني يا قلبي معاه ..
لا تجدد رجاك انه يرجع ..
و لا تحسب الأيام و التواريخ و تنطر يوم ماله موعد ...
وعد !!.. انا مليت و انا أوعد نفسي فيك ..
و انت من رسمت طريج البعد بديته بخطوة و تجاوزت الألف ..
طال طريجك و صار أبعد من إني أتبعك و امشي وراك ...
أمشي و اقول يمكن تلتفت وراك ..
تأشر لي بقلبك ..
تعالي مكانك يتحرى شوفتك و ناطر جيتك .. عجّلي ..
بس آنا وقفت بأول طريج اللي رسمته ..
و ضعت ..
تعبت و انا اشوفك و ما اسمع نداك ...
لاهي !
مشغول أو امتشاغل ..
مسجون في الغربة ..
آنا تغربت مثلك و انا بين اهلي ..
من صرت انت ديرتي و ناسي و أرضي ..
من ناديتني و جاوبتك : هلا و لبيك .. آمر كلي فداك ...
يمكن .. تناسيت
تلاهيت ..
بكل الاحوال الله معاي و معاك ..