منتديات مسك الغلا | al2la.com - عرض مشاركة واحدة

**السهم الأخير** · 12-14-15, 09:19 AM

السلام عليكم أختي الكريمة زهرة الاوركيدا

أنتِ لستِ ضعيفة الشخصية أبدا

أنتِ زهرة لم تجد البيئة الخصبة من حولها فعندما نبتت سلط الجميع عليها الضوء

أختي الكريمة أنا كنت كذا

لكن تعلمت من والدي العزيز كلمة راح أخبرك عنها .

أنا إنسان ريفي وكان نصف وقتي مع الأبقار والأغنام وكانت أجمل لحظات ملكية بالنسبة لي بأمانه.

طلب مني أبوي أني أملي الحوض بالماي عشان لما ترجع الأبقار من الجبل تلاقي الماي جاهز .

بالفعل رحت ونظفت الحوض وعبيته ماي لين انترس ع الآخر .

بعد ساعه كنت جالس أشرب شاي وهو متوقع إني ما نفذت كلامه .

قام وقال أنت ليش ما تسمع الكلام . يلا روح الحين نظف الحوض وطير الماي اللي فيه وعبيه مره ثانيه .

الإشكاليه وين؟

أنا على بالي أبوي زعلان وبغى يختبر تحملي فرحت سويت اللي قاله ورجعت أعبي الحوض من جديد ولما جا قال : ايش هذا؟

قلت له : طيرت الماي وغسلت الحوض مره ثانيه ورجعت أعبيه ماي .

قال : انت عبيته قبل وألا لأ؟

قلت : أيوه وجلست أشرب شاي .

قال: الله يبارك فيك ليش ما قلتلي ؟

قلت: المشكلة أنا توقعتك زعلان وبغيتني أعبيه أكثر من مره .

قال: الله يرضى عليك لازم تتعلم تقول لا إذا شفت الوضع فيه خطأ .

قلت: معك ما أقدر ومع غيرك إن شاء الله بسوي كذا .

قال: هذا أمر مني ما هو طلب ولا نصيحه .

قلت : تم وجلسنا نسقي البقر مع بعض

لازم يا أختي تتعلمي تقولي كلمة لا .

انتِ ما عندك مشكلة في الأخلاق والطباع أبدا لأن مليار واحد يتمنى يكون إنسان عفوي وبسيط ومتواضع وما هو قادر إلا بالتمثيل والأقنعة .

كل اللي مطلوب منك إنك تستعملي العقل لأن كل ردة فعل منك مصدرها قلبك والقلب سيد المشاعر أما لو كان العقل ملك شخصيتك راح تكوني أكثر ايجابية وتخدمي نفسك وغيرك بنفس التضحيات وأكثر .

تحية للبسطاء