ليش حنا في صراع
او بالاحرى ليش هذا الانطباع
يمكن الدنيا كذا
الحياه اصلا كذا
لازم نعيش ونعاني
الحياه اصلا كذا
صدمه وظلم واماني
والشقي يحزن ويشقى
وان نسى
من يقول انه نسى؟؟
الحزن يبقى ويبقى
كل من يسهر يسمونه حزين
ليه؟؟
السهر كله تعب
السهر كله عنا
السهر ماهوب راحه
عاشق يضمد جراحه
يسهر ويترك صباحه
كل من يسهر يسمونه حزين؟؟؟
ايه
ايه



الحزن صديت عنه واحتواني

.................................... والجروح تزيد مع ريح السنين

والسهر سكة تباريح واغاني

................................... والورق مسرح غرابيل وانين


(مشهد....)



حبها بصدق وجنون
هي بعد كانت تحبه
كانت اقرب من ظلاله وكان هو منها قريب
وش قريب
قل حبيب
كان اغلى من حبيب
كان يغيب
يعتذر منها ويغيب
تبكي بحزن ودموع
تنتظر يوم الرجوع
ويوم يرجع
تفرح وتبكي فرح
كان مخلص في غرامه
كان صادق في كلامه
كانت اصدق
لا
كانت الصدق الكبير
تعشقه حيل وتغير
كان الاول والاخير
احلفت له ماتبي غيره شريك
وهو بعد قام يحلف قال:ابيك
عاشوا احلام الغرام
وقام يكبر حلمهم
هو كتبها في قصيدِه
يكتب الحب ويعيده
واحفظت كل القصيد
احفظت كل القصيد



ايه اعشقك عشق واضح عشق صافي

............................................ اقهريبه لاحكوا تلعات جيد

قولي مخلص قولي عاشق قولي وافي

............................................ قولي حبي كل يومٍ له يزيد


(مشهد اخر....)



استمر الحب يكبر
هو عشقها
وهي بعد اكثر واكثر
قامت تلمح بخوف
كنّها كانت تحسّ
حلمهم تحت الظروف
وفي مسا
اتعس مسا
جاء يقول انّه بـ ينسى
او بالاحرى قد نسى
طاحت الدنيا عليها
ماقوت ترفع يديها
واختفى حتى الكلام
صارت الدنيا ظلام
ليه تنسى؟؟؟
كيف تنسى؟؟؟
حاول يدوّر عذر
قال انا ماكنت احبك
حبنا ماكان حب
وارضي بحكم القدر
لازم انّا نفترق
قاطعت:
قصدك انّا نحترق
(كان ودّه تكرهه
هي تعيش وتتركه
بس تعيش)
كانت تهل الدموع
وهو بعد يبكي عليها
كان واقع بأختيار
بين امر امه وابوه
وبين حب اللي يبيها




حلمنا اصبح سراب ومابقى للحلم قيمه

............................................. مات لكن والله ان الحب باقي مايموت