لو نلتفت للكلام الي على الفاضي
انكان مبطي كبود الناس من دبله
ثنتين ماغيرن فا الوقت مركاضي
الكلمه الناقصه والهرجه الخبله
الخبل يغتاض مثل الورع يختاضي
وتكرم لحانا عن الي قاصرن سبله
كلن بعقله على قول المثل راضي
وبا الطيب كلن ماوده واحدن قبله
خلك على زلت الاصحاب متغاضي
الي يبا الطيب والنوماس يتعبله
مايرضي الناس غير الشرع والقاضي
والا يفرق الناس غير مقرقع الطبله
الي يسولف بخلق الله والاعراضي
الله يقطع نمــــــــاه وينقطع وبله
لو الحسد ينقطع من بد الامراضي
حيث الحيا ينبت القيعان والعبله
حل المشاكل يبي فتال نقاضي
والكذب حبله قصير وينقط حبله
سج القدم والفجوج وساع وعراضي
في خايعن سبلت بفياضه الربله
ونكان مانته هجاج والانته ارياضي
تبا تشوف الفجوج الضوق من الدبله
العمر مره يا ليت الناس تعتاضي
والموت ماعنه يحسبلك وتحسبله
لمحت بصر كنها البراق لاناضي
عساني اموت وانا ساجدن قبله