فيلم unthinkable فحل المعضلة دي له أصل في فلسفة الأخلاق اللي بتتقسم لفلسفتين كبار في الحكم علي أخلاقية فعل ما من عدمه
الفلسفة الأولي هي الفلسفة النفعية اللي وضع أساسها جيرمي بنثام ، و دي بتقول ببساطة أن الفعل الأخلاقي هو الفعل اللي نتيجته بتخدم مجموعة اكبر من البشر ، يعني سائق القطر اللي فقد السيطرة علي القطر و هيموت في طريقه خمس أشخاص في حين أنه لو حرك العجلة للجانب الآخر هيموت شخص واحد يبقي الفعل الأخلاقي ساعتها أنه يحرك العجلة علشان دا الفعل اللي بيصب في مصلحة العدد الأكبر من الناس، أن واحد بس يموت احسن من خمسة يموتوا
الفلسفة التانيه هي الفلسفة الأخلاقية المطلقة اللي وضع أساسها كانط و اللي بتقول أن الأفعال الأخلاقية هي افعال أخلاقية لذاتها بغض النظر عن نتائجها ، فالفعل الأخلاقي هو الفعل الأخلاقي لذاته حتي لو نتيجته فيها ضرر لعدد أكبر من الناس ، الفلسفة دي بتقول أن الفلسفة النفعية خطيرة جدا و لو مديناها علي استقامتها هنعيش في غابة حرفيا ، انت مثلا لو طبيب و دخل عليك حادثة فيها خمس أشخاص بيموتوا و كل واحد فيهم محتاج عضو ما علشان يعيش و دخل عليك رجل سليم يقيس الضغط ممكن بإتباع المنطق دا تموته و تاخد الأعضاء بتاعته علشان تنقذ الخمسة التانيين لإن وفاة شخص واحد أفضل من وفاة خمس اشخاص
كمان الفلسفة دي بتشوف أن الفلسفة النفعية هي اللي قامت بسببها كل الديكتاتوريات اللي ممكن تيجي علي حساب اي أقلية لصالح الأغلبية، ستالين لما قتل تلاته مليون أوكراني كان لمصلحة الشعب الروسي اللي تعداده ميت مليون حتي هتلر نفسه لما قتل أصحاب الإعاقات كان الفعل بتاعه دا أخلاقي طبقا للفلسفة النفعية لإنهم ملايين بتاكل ومش بتنتج ولا بتساهم في المجتمع فمن مصلحة الأغلبية أنهم مايكونوش موجودين
الفلسفة النفعية تبدو مغرية جدا ، منطقي اني احرك عجلة القيادة واقتل واحد بدل ما اقتل خمسه ومنطقي اني اعذب أو اقتل طفل علشان احصل علي اعتراف من أبوه ينقذ آلاف من القنبلة لكن لو مدينا خط الفلسفة دي علي استقامته هنتحول كلنا لذئاب بشرية و هينتهي بينا الحال جميعا وفي اسرع وقت ممكن الي المقبرة
11-15-21, 09:22 AM
2613Likes
