ملحوظة: أنا مسئول عن شعري....لست ناقدا لغيري


عبدالرحمن الصافي

يوميا اقل له احبه ولا جاب
مالي سواه الله ربي وربه

هات الفتاوي ياطويلين الاشناب
مادري اواصل حب والا اكبه

بو نوره يرد

لا اقول لك صادق ولا اقول كذاب
شفت العداوه قبل اشوف المحبه

ميز ضحوك السن من حدّة الناب
والغدر نابه سم ميئوس طبه

تقرّب احباب ٍ و جنّب عن احباب
ومن لا يداري عثرتك لا تحبه

عبدالرحمن الصافي:
نصحك محله ياعريقين الانساب
شورك سمن على العسل حين صبه

نصحك جميل وصفو حكمه وجذاب
هذا دواء قلبي وشوقه وطبه

بو نوره يرد
من شاور الاجواد لا شك ما خاب
والسوق ماكل ٍ ربح يوم طبّه

اخذ النصيحه قبل طالب و طلّاب
والريع يا زبن المناعير ذبّه !!

عبدالرحمن الصافي

بعض البلا ماينفعه كثرة اعشاب
ماغير كلمة قولك انك تحبه

هذي حقيقه جت من اجناب واعراب
كثر الحطب اصغر شراره تشبه

بو نوره يرد

انته وانا صرنا مغاريف شرّاب
مره تحقن الما و مره تصبه !!

يالله عسى من يطلب العشق ما خاب
يضرب بحور الحب غبّه و غبّه

سلام

صح لسانك والنعم بأثنينكم وعليك السلام ورحمة الله و بركاتة

محاورة جميلة استمعت بقرائتها
صحت الالسن يابونورة

هلا وغلا يا خوي
شكرا لحضورك البهي وتفاعلك المقدر
بس من قال أنني ما اعطيته الحل
الا عطيته الحل ولو رجعت للابيات تلقاه بين ثنايا ابياتي
وحتى رده كان فيه اقتناع بحلولي

ويكفيك هالبيتين منه اثبات باقتناعه

نصحك محله ياعريقين الانساب
شورك سمن على العسل حين صبه

نصحك جميل وصفو حكمه وجذاب
هذا دواء قلبي وشوقه وطبه

كل هذا وجبت العيد فيه
الله المستعان

تحياتي