فداك الشعر وشتات البعاد وطاري الأحباب
و حنين الليل يوم أنه وقف بي أرتقب بابك

نديم البال ماجاد القصيد ولا مكثت أرتاب
وأنا هذا القصيد اللي بعد ماغبت ماغابك

عسى حلوَ الليّالي اللي معك يا غايتي تزداد
و أعيشك عُمر و أهنَا بك حياةٍ مالها آخر .

كيف ما انتبه لك . . مثل ما تنتبه لي
وأنت مصدر شغف هذي الحياة القصيره

عقب ما تهت بالأيّام ، حصّلتك الضيّ
من عرفتك عرفت إن كل ما راح خيره

جابك الله حلمٍ يكمل .. ويكتمل في
كنّك آسف . . عن أحزان الليال المريره

عقبك . . يمرّني غيرك وكنّه ولا شي
فيه إنسان عنده أنت ويشوف غيره !

جيتك من اللهفه على حب واعجاب
ماهو على ما قيل صدفه لقيتك

الناس واجد والمحبه لها ابواب
مير الغلا وقف على باب .. بيتك.

معك و ان زلّت الحروه .. و طال البين :
معك ( يا ضحكة الفايت من ايـامي ) !

معك ( مافيه حدّ اليا متى و الـ وين ) ؟
معك حتى معاك .. ( احقق احلامي ) !

احبك ... مو مهم ( تحبني ) للحين ؟
انـا حُبي ... معاك ( يعالج ) ... الامي !

يـكفيني ! عشان اقضي معاك سنين :
و يروي ( سيدي بك ) قلبي الضامي !

نديمة دروبي .. ما بقى في رحابك فيّ
‏خذتك الظروف ولا اختفيتي ، ولا بنتي

‏أسوق الرجا في قولة الحي يلقى الحيّ
‏وأنا داري إنّك بعد قسوتك . . ما لنتي

‏لو إن الزمن .. قادر يرجّعك ، بين يديّ
‏من يرجّعك في نظرتي .. مثل ما كنتي

‏مع إنك تركتي عاشقك في دروب الغيّ
‏وفي عينه الايام . . ( شانت ) ولا شنتي

‏محبتْك حتى في غيابك !.. مثل ما هيّ
‏لا هانت . . لياليك القديمة ، ولا هنتي

‏من المستحيل يحول عن ذكرياتك شيّ
‏لو يحول من دون اللقاء حاجز إسمنتي

‏يروحون !.. كل الناس مني شوي شويّ
‏ولا فيه أحد يبقى على البال .. غير أنتي



عبدالله السراهيد