منتديات مسك الغلا | al2la.com

- - الخواف .... (https://www.al2la.com/vb/t124633.html)

مافيه أحلى من البرد .....الواحد يقدر يتحرك في النهار براحته ....

في البرد الأوادم والسيارات يرتاحون ...مايكون عليهم اجهاد بسبب الحرارة ...

ويكفي ان الواحد يرتاح راسه من رجة المكيفات.....الواحد في الصيف يوم يدخل الحارة كأنه داخل مجمع ورش حدادة للأبواب والشبابيك ...فـ مثلًا يوم تدخل الحارة تسمع صوت مكيف ( جنرال ) قديم ... صوته يرن في عظام راسك وأنت لسا مادخلت الحارة...

وأبو حمود جاركم تلقى المروحة حقت مكيفه تحك في حاجة داخل المكيف ..والصوت مرة يطلع ومرة لا ...يعني صوت يجيبلك القلق ...

وبرضه وأنت ماشي لبيتكم تاخذ حذرك من مكيف أم خالد لايضرب فـ راسك ..لأن الجزء الخارجي منه مايل على تحت بزيادة عشان الماء اللي يطلع من المكيف ينزل في الشارع ومايدخل بيتها ...

وبرضه وأنت ماشي في الحارة تشوف قدامك سيارة ددسن غمارة مكتوب عليها ( المتنبي لصيانة المكيفات والأجهزة الكهربائية ) ...واقف عند باب جاركم أبو سلطان ...لأن عنده مكيف الوجهية تثلج ...ومايطلّع هوا بارد ... وعنده مكيف مرمي تحت الدرج وخلاهم ياخذونه مع المكيف الخربان عشان يغسلونه ...

ومنيرة كل الحارة يسمعون تهديدها لزوجها ....تهدده انها ماتسوي فطور في رمضان إذا ما حط مكيف في المطبخ ....لكن هو أموره المادية ماتساعده ...

والعم سليمان كل ما شاف واحد من جيرانه في الشارع ...جلس يسأله عن المكيفات هل أحسن مكيف الاسبليت ولا مكيف الشباك ..؟؟!..

طبعًا هذا السؤال ماسك معه كل سنة عند بداية الصيف ...وهو لا اشترى لا سبليت ولا مكيف شباك ..!!..مخه مش متقبلها ....لأن الاصدار عنده واقف على المكيف الصحراوي ماركة ( الواحة ) ..

لكن في البرد ....كل الحارة عنده على شبة النار .....بمعنى آخر : هو الـ ( بوليفارد ) حق الحارة في البرد ....

.......

بين الحين والآخر يسرح تفكيري مع ناس ماتوا ....من أقارب ومعارف ...رغم ان علاقتي في بعضهم فقط السلام عليكم وعليكم السلام ...

لكن كل فترة وفترة وبكثرة يجون على بالي... وأجلس أتذكر حياتهم وهم أحياء ...

......

( العمر مجرد أرقام ) ...( احترم سنك ) ..

الشخص اللي يقول ( العمر مجرد أرقام ) هو نفس الشخص اللي يقول ( احترم سنك ) ....

أغلب الناس ...يقولون (العمر مجرد أرقام ..والروح الشبابية هي اللي تغذي الجسم وتقويه ) ..!!

لكن لما يشوفوا مثلًا واحد عمره 55 ...لابس حاجة شبابية أو فكره شبابي أو جلس يلعب في الملاهي ..أو .أو ...الخ ...راح يسمع منهم كلمة ( احترم سنك ) ...!!

وأغلب ناس يقولوا ( احترم سنك ) هم الحريم .....وفي نفس الوقت هن اللي متزعمات مقولة ( العمر مجرد أرقام ) ...!!

ولو الوحدة منهن تشوف حرمة عمرها 60 ..لابسة أحلى لبس وحاطه مكياج وحركات وسكنات .......راح الحريم ينظرولها بنص عين ويقولوا عنها مفكرة نفسها لسا مراهقة ..!!

ياشيخ سلمولي على الرجال مايحطموا بعضهم ...إذا مرة مرة مررررة بيعلقون عليه..يقولوا ( أحلى ياعريس محد قدك ) ...ويقولوها بنفس طيبة ...

مرة من المرات بنت كاتبة لواحد في النت ( أنت عندك مراهقة متأخرة )..!!....وعمر الرجل 38 سنة ..!

مدري ليش الحريم نفوسهم ضيقة ويحبون ينقدوا بعضهن على الرايحة والجاية ..!!

.....

اقتباس : من مدونة رومانس ( بنادول )

الخواف ..
مين ودك يكون هنا من غرام ..؟!
يعني تقدر تقول فاقد حضوره..

بيني وبينك كل اللي كانوا شغالين في قسم النقاش .... لأني كنت أكثر شي متواجد فيه ...لأن يا شيخ تحس فيه حياة .. مضاربات وهوشات ..وهذا يسب وهذا يسخط ..وهذا يقول أنا خلاص أبطلع ولا عاد أدخل هنا ..وهذا يقول أنتم ماتنفعون للنقاش ..و..الخ ..وفي النهاية كلهم مبلطين في المنتدى ولا أحد يسجل خروجي نهائي رغم كل اللي يحصل فيه ..

المهم من ناحية الأسماء فأنا من النوع اللي ينسى الأسماء بسرعة ...وفعلًا ناسي أساميهم ..لكن اللي أتذكرهم : روان وراحلة لن أدوم ..ومصري ناسي اسمه بس هو شغال في مستشفى ..وشغلته تخدير ..

والمشكلة ان بعضهم أتذكرهم ..... بس ناسي أساميهم ..

أنا هالحين وأنا أكتب هذا الرد أحاول أتذكر بعض الأسماء بس ماقدرت ..

وبرضه فيه أسماء هنا في مسك كانوا في غرام لكن أساميهم هناك ماني قادر أتذكرها ...

.....

مانكب عفشنا إلا كلمة ( أنت تستطيع ) ...!!!...ياعمي الكلام سهل ...

شي ماتقدر عليه ..روح شوفلك طريق آخر يوصلك لهدف مرادف لهدفك الأول اللي كنت تحاول فيه ....بدل ماتضيع وقتك ورا شعار ( أنت تستطيع )..!

في البرد ..الغالب الناس تلبس ثوب ملون ...يعني يقدر الواحد يلبس تحت الثوب الملون ملابس رياضة ....

فـ أنا بالنسبة لي ألبس ملابس رياضة تحت ( ثوب البرد ) لأنه مش شفاف ...ملون ...طبعًا الترنق يكون برمودا ..تحت الركبة بشوية ...مثل سروال عبسي ...

وعلى فكرة عندي ترنق زي سروال عبسي بس لونه نيلي غامق ...وأغطي اطرافه بالشرَّررراب ..بتشديد حرف الراء مع الفتح ..

المهم أحضر مجالس وأحضر مناسبات وأقضي مشاويري ..وعادي محد شايف شي ... ...

والأهم من هذا كله ان الواحد في البرد يكرف الثوب الملون لين تطلع ريحته ..يعني مايبان فيه الوسخ ...

ياليتهم يخترعون لنا ثوب ملون مخصوص للصيف ...اللون الأبيض مشاكله كثيرة في الصيف ...لأن الرجل عندنا كل ملابسه لونها أبيض ..وأي شي يبان فيه ...

.....