ما تجرأت اعترف لك عن شعوري :
خايفاً .... و الخايف شْلون يْتكلّم ؟

انتِ يــ اكثر شي احس انه ضروري :
( كثر ما قلبي تمناك .. و تحلّم ) !

ضحكتي لـ اجلك و من اجلك حضوري :
علّم اللي ما يعرف ... او لا تعلّم !

كل درب امشيه يستاهل مروري :
دام لك في مفرقه وجهٍ .. يسلّم !

تدري انك جيت من داعي سروري :
و كل شي ان غبت يدعوني اتألم !

اتواضع .. لين ( يقبل بك غروري ) :
و ( اتصبر .. لين تأتي .. و اتظلّم ) !

و لا خفت لك نور يخفت جل نوري :
و الحزن يهتف على قلبي .. ( تولّم ) !