طيب يا شباب واضح ان في اختلاف جذري في وجهات النظر بين الشباب والبنات
في منهم المؤيد وفي منهم المعارض

طيب صلوا بينا علي النبي

زماااان كانت عقليات الناس تقريباً فكرها واحد ... البيوت كلها شبه بعض في نظام حياتها
ان البنت ممكن بتوصل لدرجة معينة من التعليم وممكن كمان متكونش متعلمة وأهلها يبقوا عايزنها تتجوز من راجل سمعتة طيبة وقادر يصرف عليها وتجيب أولاد ويبقي هو ده كل همها في الحياة
انها تربي العيال كويس وتسمع كلام جوزها وأنه يقدرها ك هانم عايشة في بيتة وبكده الأهل بيعتبروا انهم قدموا رسالتهم في الحياة خلاص
بغض النظر بقي عن فرق السن بينهم المهم أن هي بتحترمة لأنها طلعت لاقت والدتها بتحترم والدها والدنيا ماشية علي كده
لا كان في حب قبل الجواز ولا يحزنون
الجواز يا كان عن طريق الأقارب
أو الخاطبة
أو الجيران
أو صاحب أخوها
وكان يا هناها يا سعدها لو جه ل بنتها عريس موظف تبقي ياما هنا ياما هناك


سؤال ... هل حياتهم كانت بتنجح ؟
أه غالباً كانت بتنجح مش بس غالباً هي مؤكد بتنجح
ومكونتش بتسمع أن واحدة اتطلقت
اه ممكن تغضب لها كام يوم لكن طلاق لأ
وحتي لو قررت تغضب بتفكر الف مرة قبل ما تسيب البيت
لأن أساسا فكرة ترك البيت عيب

السؤال الثاني .. ليه كانت حياتهم بتنجح ؟
لأن كل واحد فيهم كان عارف اللي ليه واللي عليه
ف بيحاولوا انهم يمشوا المركب بمهارة وحتي لو زعلوا سوا ف زعلهم مكنش بيطول
وكانت بتستمر الحياة ومتحسش أن في وضع شاذ في المجتمع والكل راضي والدنيا زي الفل





يتبع



.

بعد كده ايه اللي كان بيحصل
العادي بتاع الحياة ... الدنيا ابتدت تتطور
البنات عرفت طريقها للمدارس وبدأت تكمل تعليمها وفي كتير منهم وصلوا للجامعة
وبقوا أكثر فهماً ووعيا لأنهم خرجوا للحياة واحتكوا بشخصيات مختلفة فكرياً
وبعد كده خرجوا للمجال العملي ودائرة معرفتهم بالحياة بقت أوسع
بعد ما كانوا بين أربع حيطان وبكتيرة الزيارات كانت من بيت لبيت .. أصبحوا بيروحوا وييجوا وبيشوفوا ويسمعوا ويناقشوا وووووووو طبيعي حيحصل تطور في شخصياتهم وعقلياتهم
ومننساش دور التليفزيون وقتها .. بقي تقريباً في كل البيوت وبرامج المرأة بقي لها دور كبير في تسليط الضوء الأسرة عموما وبقت تقدم النصائح للأهل أن
* البنت لازم تكمل تعليمها علشان تعرف تعلم اولادها كويس
* وأنها تشتغل علشان يكون لها كيان
* وان بلاش جواز الأقارب لأن ممكن يكون سبب في وجود أطفال مشوهيين
وأن
وأن
وأن

وطبعاً في أسر كتير كانت بتاخد الكلام ده وتعمل بيه وفي أسر تانية كانت ودن من طين وودن من عجين





يتبع




.