عيوني مايجيها النوم
من همومٍ تباريها
ومحد من الخطا معصوم
حياة وذي بلاويها
مقدّر كل شي مقسوم
ومنيّتنا بنلاقيها
علينا في صلاه وصوم
ومن الله عوننا فيها
كلامٍ واضح ومعلوم
ومن حرٍ لأهاليها
بدرب أشوف فيه رخوم
خطا رجليّ ممشيها
أنا راعي حمِل وعزوم
وكفيل الروح باريها
واذا تبغى الصديق يدوم
له الزّلّات عدّيها
و ورّه فعلك المحشوم
ولا بالمثل تنهيها
بعدها ماعليك أي لوم
لو افعاله يردّيها
وأخدم لا تكُن مخدوم
وترقى في أعاليها
تمسك بالمراجل دوم
من اهلها وانت راعيها
لنفسك لا تكُن مهزوم
و خالفها أمانيها
ترا الدنيا بتضحك يوم
و تنكّد فيك تاليها
شدايد حبلها مبروم
وفي صبرك تعدّيها
لا تيأس وارضى بالمقسوم
بتزهر لك أراضيها
بيغرق من جهَل بالعُوم
نصايح احتزم فيها
قواعد بالحياه لزوم
علينا إنّا نجاريها
عسى خيرالله فينا دوم
بقاصيها ودانيها
نشدتك من يزور القوم
ويتركهم بناعيها
ياحظ اللي أعدّ ليوم
شوفه وروحه مرضيها
هني والا الرّدي مهموم
بنفسه كيف يحميها
بفعلك يا آدمي محكوم
وصفحاتك بتمليها