بابا الله يرحمه كان دايما له مقوله معرفش الحقيقة كان جايبها منين

لما ييجي حد يستلف منك خليه يبوس ايدك
ليه ؟؟
علشان يوم ما حتيجي تطالبة بفلوسك حيخليك تبوس رجليه


الخلاصة

انا لو حد احتاج مني فلوس سلف بديله ومش بستني يردها
☆ لو هو ردها خير وبركة
☆ مردهاش مسمحاه فيها لوجه الله


انا بقي يوم ما افكر استلف ماليش غير أمي واخواتي ومستحيل لو حموت اخد من غيرهم حتي الباشا مش حاخد منه
وانا وماما واخواتي مش بنعتبر الموضوع سلف .. فلوسنا واحد اللي محتاج ياخد ... ووقت ربنا ما يسهل يرجعها




مودتي لك





.

قال رسول الله صلى الله عليه وسلم: «مَن أنظَر معسرًا فله كل يومٍ مثله صدقةٌ».
يعني: لما أسلف واحد 100جنيه= تُكتب لي كل يوم صدقة بـ 100ج، لغاية ما يرجعهم

وهتحس بعظيم هذا الأجر لما تكون واقع في ضيقة فعلا ومحتاج ، وقتها هتعرف ليه ربنا حط الأجر العظيم دا على تفريج كرب الناس
شخصيًا:
في دائرتي الصغيرة ممكن واحد أو اتنين بيستلفوا مني - مبالغ بسيطة مش كبيرة قوي- وبيرجعوها تاني

وأنا أوقات بعمل كدا كمان
أذكر في مرة كنت محتاج 100جنيه أكشف على ابني الصغير، ومكنش معي فلوس خالص وابني تعبان، ومكنتش عارف أستلف من حد لأني بستحي إني أطلب حاجة
وتحت الاضطرار، كتبت رسالة وبعتها لصاحب لي لأني اتكسفت اتصل مكالمة صوتية!

الاحتياج مر، وأوقات بنكون مضطرين فعلا
الخلاصة:
لو انت في دايرة معارفك ثقات تعرفهم ولقتهم محتاجين مش تبخل عليهم باللي تسطيعه، أو تسعى له
ع الأقل في دايرة اصحابك
المؤمن أخو المؤمن