مشكلتي مع امي واختي وزوج اختي
 

السلام عليكم

انا شاب عمري 24 سنة عندي اخت اكبر مني متزوجة وعندي اثنين اخوان اصغر مني وانا امي الله يحفظها عندي مشكلة معها وهي انها ما تطلب مني شيء الا وانا بالدوام واذا قلت لها انا بالدوام مشغول واذا طلعت راح اجيب لك اللي تبين وانا راجع تصارخ علي وتقول انا ما جبت رجال وانت ما منك فايدة ووووالخ ، يعني بالله شسوي اترك دوامي عشان اروح بنده اشتري بصل وطماط وخبز واوديها للبيت وبعدها ارجع للدوام يعني مو منطق ابد والمصيبة انها ما تطلب لكا اكون فاضي مثل لما ارجع العصر من الدوام او لما اكون فاضي يوم الجمعة والسبت ، ودايم اذا ما جبت لها شيء تتصل على زوج اختي وهو يجيب لها الاغراض لأن زوج اختي وكيل مدرسة ويطلع 12 ونص او وحدة واختي بعد مدرسة فزوج اختي بحكم انه وكيل مدرسة يقدر يطلع من الدوام ويروح يشتري لها اغراض ويوديها البيت وامي بس اذا شافتني تقول ما جبت رجال وما منك فايدة رجال البيت هو زوج اختك لبى قلبه كل ما طلبت شيء يروح يجيبه لي ومدري وش ، انا انجنيت يعني ايش ممكن اسوي عشان ارضيها ، والحين صارت تزعل لما ارجع البيت واشوف اختي وزوج اختي جايين عندنا ومبلطين وهذي عادتهم كل يوم ثلاثة واحياناً يجون كل يوم من بعد دوامهم يجون يتغدون والعصر شاهي وقهوة ويقعدون لين الساعة 9 مرات ويمشون ويا ويلي اذا رجعت البيت وارتحت ولا اخذت قيلولة لازم تبيني اقعد مع زوج اختي الثور عشان ما يحس انه غير مرغوب فيه واني لازم اضيفه وعشان اختي لا تزعل فاضطر مرات اني استحمله ومشي معه واسمع سوالفه البايخة عشان امي واختي ما يسوون لي صداع ، طبعاً امي ما اقدر اقول لها شيء واختي الكبيرة مرات تعلعلع بلسانها بس اطنشها لانها اختي الكبيرة ، ومرة ارتفع ضغطي لما رجعت بيتنا ولقيت اختي بس لحالها فقلت لأمي وين متعب اقصد زوج اختي غريبة موب موجود قالت امي بالمجلس قاعد وجيت بروح اقعد معاه قالت لي امي وين رايح قلت بروح المجلس عند متعب قالت امي روح غير ملابسك قبل لا تقعد عند زوج اختك بالشورت ، يعني مليون مرة البس شورت وبنطلون وقميص وكاب واجلس معاه ما ادري شفيها هالمرة تدور سبب على اللبس ، المهم فقلت ليش يعني اول مرة البس شورت فقالت لا بس زوج اختك بالمجلس زي الرجال ولابس ثوب وشماغ وانت بتدخل عليه كذا واختي ترمي كلام وامي تضغط علي وانفجرت عليهم وصارخت وتهاوشت معهم بس ما قللت ادبي عليهم لأني عصبت بسبب انهم كل يوم يدورون شيء يعصبون عليه ويرفعون ضغطي فيه ، وانا وصلت لمرحلة ما اقدر اتحمل احس بنفجر عليهم حتى زوج اختي صار يتدخل ويعلق على لبسي ويقول ورى ما تقعد في البيت وتسعسع بالشوارع امك تحتاجك ومدري ايش وانا خفت ارد عليه ويصيرون كلهم علي ، فيه احد عنده ام دي كذا ما يرضيها شيء ، يعني ايش اسوي عشان ارتاح من الحنة

الله يعينك على ما بلاك
إذا تقدر تسافر سافر واترك لهم البيت مادام وجودك صار
عبئ عليهم.. او مافي أمامك الا ان تقلع اختك وزوجها من
البيت وتكون فعلا رجل البيت...
اما موضوع أغراض البيت فهذا أراه مجرد حجج.. تقدر
تجيب الأغراض في وقت خارج دوامك او تجيب زيادة
تكفى يومين..
أو أن امك من وراء هذا الضغط يريدك تتزوج وتستقل
عنها..

قول لوالدتك إدارة وظيفتي تمنعني من الخروج أثناء الدوام
ولكن من عيوني وأنا راجع من الدوام بعدي على بنده وأشتري الأغراض اللي تبينها

أو قول لها كل مساء وش تبون أجيب من برى حتى لا تتصلون علي وقت الدوام .

وإنحلت المشكله إن شاء الله

خصص وقت للمقاضي

واذا الوالدة تقدر خذها معك تتسوق

وزوج اختك انت رجال اعرف كيف تتعامل معه واذا شافك انتم مهتم باهلك ما يصير عنده حجة يتدخل

او فكر تتزوج كذا ماراح يقدر يجيكم هعهعهعهعهع

أعتذر ياصاحب الموضوع قرات مشكلتك ورديت عليك على عجله بدون أن آنتبه للجنس هل أنت بنت أم شاب

ولكن ماقصر بعض الأعضاء وصلني منهم تنبيهات يبلغوني بأنك شاب مما أجبرني ذلك أقوم بتعديل ردي الأول وحذف ردي الثاني بما يتناسب في البحث عن حلول لمشكلتك .

قلت لها مليون مرة وهي تدري بس تهاوش وتصارخ وتقول منت رجال ما تنفع بشيء وزوج اختك بس اتصل عليه يرد ويقول لي ابشري ويجيب لي كل شيء ، طيب اذا هو وكيل مدرسة وفاضي ويقدر يطلع من الدوام بكيفه ويروح ويجي انا شسوي اذا دوامي ما اقدر اتركه عشان اجيب مقاضي بيت