تابع ...


أما عزايم الحريم داخل بيوتهن .....فـ هنا صاحبة العزومة تحتاج كرتون حبوب ضغط وسرير زي سرير المستشفى ومحلول ألف لتر عشان تهدأ أعصابها كل مرة ومرة ... أثناء فترة وجود الحريم بعيالهن ..

لأن الأم شايفة أذية ولدها وازعاجه وتكسيره لأغراض البيت ....... ولو صاحبة البيت تنهاه عن تصرفاته هذي ..راح أمه تزعل وتاخذ موقف منها...

مثل هذي الحرمة من المفروض محد يعزمها ....لأنها حتى عيالها ما تحب أحد يكلمهم وهم جالسين مبهذلين البيت ومسببين رجة وصجة ...



المهم اللي ما تقدر تمسك عيالها في بيوت الناس .... الواجب عليها انها تجلس في بيتها ...

ولا تسوي فيها انها مسكينة ومكروهة ومحد يحبها هي وعيالها ومدري إيش ..!!..وغيره من الدراما اللي تسويها لنفسها ولعيالها ...!!..

'





انا ام ومعاشره مجتمع الامهات وعندي اخوان صغار
الحمدلله ماتذكر الوالده اخذت اخواني او واحنا صغار للعزايم
حتى لو تمون عليهم ..
لو بتكلم من ناحية طفلي فهو مقعد الله يطرح الشفاء بجسده
بس من كان صغير مستحيل اني اقلطه ع السفره معاي
ونادراً ما اخذه للأجتماعات لان الاجتماعات كلها صراخ اطفال و ازعاج

لو بنتكلم ع جيلين .. جيل زمان كانوا بشارع يلعبون وكان الجار و العم يربون
وتذكر مستحيل يقلطون مع الرجال ع عشاهم
واللحين مع كثرة السكريات صاروا الاطفال فيهم فرط حركة للأسف
وعلى العشاء الاب ينادي ولده جنبه ويضايق الرجال بمكانهم ..

والام اذا اطفالها مزعجين تحصل جاها تبلد اتجاه اطفالها
خاصةً اذا ماتملك خادمة هنا ماتقدر تعقب او تعلق .. لكن عتبي على الي عندها خادمة
وبكل عزومه اذا اطفالها عندهم فرط حركة و المكان غير متسع وتجيبهم

من ناحيتي ونهاية حديثي .. ما اايد حضور اطفالي لعزايم كبيرا
اولاً يتعلمون من بعض سلوكيات غلط. واذا اجتمعوا تنحرج من راعية العزيمه
والام تقعد تسكت وتراقب ولا هي الي روقت وتقهوت


الطريقة السليمة ..
الاطفال تخصص لهم بنص اسبوع
يسلمون ع اجدادهم واقربائهم و الويكند يوم واحد تمشيه خاصة لهم
كذا انت تتحكم بتربيتهم وماقصرت معاهم
لان صراحةً حتى كبار السن ماعاد فيهم حيل يتحملون
والصلاح و الهداية من ربي الله يصلح لنا ذريتنا

بالعكس الطفل يتعود مع ابوه أفضل من جلستة بالبيت

عندنا الصغار لهم سفرة خاصة برمضان عشان يتشجعوا على الصيام واذا رحنا نصلي غزو على سفرتنا هههههه

أحسنت التصرف أخي الخواف

صاحب العزيمة أكيد يشعر بالحرج من إنه يكلم الأولاد المزعجين

عموما

عندنا موضوع العزايم واضح تقريبا

العزايم العائلية انت و عيالك
العزايم الاجتماعية غالبا يصاحبها تخصيص
الدعوة شخصية أو مع العيال الكبار أو الجميع

بالنسبة إذا صار الضيف وجهه عريض و ما يكلم ولده المزعج
الله يرحمه أبوي ما يغشمر بهالسوالف ههههه كان يكلم الأطفال المزعجين إذا شاف إنه أهلهم مخلينهم على كيفهم

و احنا تربينا على ( اللبيب بالإشارة يفهم ) خزه من أمي أو أبوي نفهم منها المطلوب
خزَّه : نظرة قوية و فيها أوامر

المفروض الأبو ياخذ عياله عشان يتعلمون أدب المجالس

و نفس الشي الأم تاخذ بناتها اللي يفهمون و يتعلمون آداب المجلس من سلام و كلام و خفض الصوت و احترام الكبار و عدم المقاطعة و الذرابة بالضيافة

شكرا الخواف