على ذِيك الدِّيار اللي لها أعلنت اْنا مسراي
عسى طيفه ولو صُدفه هناك اِنّه يلاقيني


أنا مِن يوم غابت يَمَّها عجزت تُمر خطاي
أخاف الماضي بْذِكرى على غفلة يناديني


أخاف وْلَكِن اْشواقي حَدَتْ قلبي على أقصاي
أزور اطلالها اللي وَثِّقت ما بينها وبيني


عظيم الشوق في قلبي لها ما تاسَعه دنياي
ومهما جيت اْداري يلمحه من ناظر بعيني


يظن الحال فـِ الأطلال وِدْيار الحبيب شفاي
(وَنَا) اْدري كل ما فيها مِن الآخر يعنِّيني


أنا تتعبني الذكرى أنا فـِ الذاكرة بلواي
ولو أقدر على النسيان كان اليوم يا زِينِي


أنا لو خضت في بحر الهوى ما تُهت عن مرساي
ولكن رحلة الماضي بها تاهت عناويني


أشوف اهداف قدامي ولا ياصل لها مرماي
(وَنَا) اْدري طردها عن رحلة ايامي يلهّيني


أمامي دربي السالك ولكن ما مشت هقواي
تعثَّر فـِ الطريق اللي تمنيته يخاويني


وضيَّعت اْتِّجاهاتي ابتعدت وتُهت عن مَغْنَاي
فلا الحاضر يسايرني ولا الماضي يراضيني


أبَوْقَف هاهنا لحظة عسى لي تتضح رؤياي
عسى أقدر ألاقي ما تمنيته مِن سنيني





سُهيل

هلا بالعزيز أعد النجوم
صح بدنك وطبت يا الغالي
الأروع مرورك ربي يسعد قلبك
كل الشكر والعرفان
ربي يسعدك